Ha Balang Presbyterian Umling, rakhe ka KJCEU ia ka jingdap 125 snem

Nongpoh:Ka Khasi Jaintia Christian Endeavour Union, myn hynnin ka sngi ka la sdang ban rakhe ia ka jingdap ba 125 snem ka Union, naduh ba la suit la shor ia ka KJCEU bad katei ka jingsdang jong katei ka jingrakhe la sdang ha Umling C.E Society jong ka Balang Presbyterian Umling ha Ri Bhoi.

Ha kaba sdang jong katei ka jingrakhe dap 125 snem, ka Christian Endeavor ha ka Ri Lum Khasi-Jaintia, ka la buh ia ka phang pdeng, ‘Ha U Ngi Im Ngi Khih bad Ngi Long’ kaba dei katkum ki Kam ki Apostol 17:28.
Ha kaba sdang jong katei ka jingrakhe, la pyniaid da u Rev. S.D Lanong, uba dei u Chairman ka Jubilee Committee bad kiba la don ha katei ka sngi, ki kynthup ia u Rev. B.R Pamshong, u Rev. A.T Sohliya, President ka KJCE Union, ki tymmen basan ki Rangbah Balang, nalorkata la wan ban pynshngain da u Bah Mayrald Born Syiem, MLA Nongpoh, u Bah Balajied Rani MDC Nongpoh lem bad kiwei.

Lyngba jong katei ka sngi, la plie ia u maw sah jingkynmaw (Maw Tablet) da u Rev. A.T Sohliya bad la pynlait ruh ïaka Souvenir da u Rev. B.R Pamshong bad bud ruh sa ka jingpynher ia ka lama Jubilee.