Lut da ki klur, hynrei jot rathai ka Heritage Village ha Mawphlang

Shillong:Kum shi bynta ban shim ia ka sienjam ban pynbha biang ia ki jingbuh jingsat jong ka Haritage Village, kaba don ha ka Hima Mawphlang, ka KHADC ha ryngkat ka jingia mynjur bad ka Hima, ki la rai ban aiwai ia ka kam ban pynbha bad ban sumar ia kane ka jaka jngohkai pyrthei ha ka kynhun jong ka Living root.

Haba iakren bad ki lad pathai khubor, na ka liang u CEM u bah Titostarwell Chyne u la iathuh ba kat kum ka jingiasoi ia ka Heritage Village ha Mawphlang la buh ban peit bad sumar da ka Hima Mawphlang, hynrei kane ka jaka mynta ka la shu jot rathai,wat la na ka liang ka District Council ka la pynlut da ki klur.

U Bah Chyne, u la iathuh ba ka EC barim ka la dep ban theh pisa da ki klur ban pynbha, hynrei kane ka jaka haduh mynta ym pat lah ban pynbha katba mynta ka EC bathymmai ka dang pynlut tang T80 lak bad ka jingtrei ka la nang iaid.

U bah Chyne u la iathuh ruh ba kat kum ka rai ba la mynjur lang hapdeng ka Hima Mawphlang bad ka District Council ka bhah kan long 60% kan leit sha ka Council bad 40 % kan leit sha ka Hima Mawphlang.