Lada phi iaineh

AIS SUJA

“Lada phi iaineh,” ka kyntien iaineh kamut, ka jing kut jingmut, ne bymkhih jingmut shawei pat ne kaba hun ha kata kaba don mynta. Ban iaineh ha kano kano ka kam la ka long kaba rit ka jingioh nong, kan sa poi ka por ba ka bainong jingiaineh kan sa heh ne khraw.

Kumjuh ruh u Jisu u ong ia kane ka kyntien iaineh. “Lada phi iaineh ha nga, ki ktien jong nga ki iaineh ha phi, ia kaei kaei ruh ba phi mon (kwah), phin pan – te kan long ia phi. Ioanis 15:7.

Lada uno uno u briew ne khristan uba la ngeit ha ka kyrteng u Jisu, lada un iaineh ha kata ka kyrteng Jisu, bad ngeit ha ka ktien u Blei kat kumba la thoh ha ka (Bible), te ia kaei kaei kaba u briew un pan (duwai), kata kan long ne jia beit kat kum ki jingpan jong u.

Bunsien ngi ju ong – Ngi pan ha jingduwai hynrei ym ioh jubab, ym ioh eiei, haba kumta u briew u kynran dien noh ban pan bad um iaineh ha kata ka jingpan. U Briew u donkam ban Iit ialade. Uba kumno u long kumno un leit ha khmat u Blei da ka jingpynrit ne da ka jingpynkhraw ialade haba pan, khnang ba kata ka jingpan kan long kaba iaineh kaba shisha. U Jisu u ong – “kiei kiei ruh ba phi pan na u kpa (Blei) ha ka kyrteng jong nga (ha ka kyrteng u Jisu), te un ai haphi. U Jisu u ong – “Haduh mynta phim pat ju pan eiei ruh em ha ka kyrteng jong nga: To pan, te phin sa ioh diang ba kata ka jingkmen jong phi kan long kaba dap. Ioanis 16:23-24. Tangba bunsien u briew u pan ia ka spah, hynrei u Blei pat u ong ia u briew to wat shwa ia ka hima u Blei bad ia ka hok jong u, te ia kiei kiei yn sa ai lang tam ha phi. Kaba mut ba u Briew u dei ban wat shwa ia ka Hima u Blei, bad ia ka spah hadien. Mathaios 6:33-34.

Hynrei tang kane kawei kaba donkam tam ia u briew ka long ban iaineh bad ngeit haba pan, bad ba ki ktien kiba u Jisu u kren lyngba ka ktien jong u ka bible ki dei ban don hapoh ka dohnud bad ri khop ia kata. U Briew u dei ban tip ia ka ktien u Blei namar ha ka ktien u Blei (Bible) u don u Blei bad ki kular jong u. Ymlah ban shu pan na u Blei ne ha ka kyrteng u Jisu khlem da ngeit bad khlem da iaineh ha kata ha kaba ngi pan na u.

Ka ktien u Blei ka iathuh ba la ai ha u khun (Jisu) ia ka bor baroh ha bneng bad ha khyndew. Mathaios 28:18. Kumta lada u briew un iaineh ha ka ktien u Jisu, kaei kaei kaba yn pan ha kata ka kyrteng, u Jisu un jubab beit. Ki jingeh kin kynriah beit, ki jingpang kin mih beit, ki ksuid kin phet beit ki jingkyrkhu (blessing) kin wan beit ki jingtim (Cursing) ki jah beit. Amen. Lada ki briew kiba la khot da ka kyrteng jong nga (ha ka kyrteng Jisu), kin pynrit ialade kin duwai kin wad ia ka khmat jong nga, kin phai na ki lynti bymman te ngan sngew na bneng, ngan map ia ki pop jong ki ngan pynkhiah ia ka Ri jong ki. 2 Chronicle 7:14. Lada ki briew ki iaineh ha ka kyrteng u Jisu, kin pynrit kin duwai, u Blei un sngew beit naduh bneng sha kane ka pyrthei.

U Jisu u ong – “Uei u briew uba naphi lada u khun jong u un pan ia u kpu u ban ai da u maw ha u? lane un pan da ka dohkha, un ai da u bsein ha u?. Lada ki bymman (ki briew) ki tip ia kaba ai ia ki jingai ba bha ha ki khun jong ki, te kaba katno tam u kpa (Blei) jong phi uba ha bneng un ai ia kiei kiei ruh kiba bha ha kita kiba pan na u. Mathaios 7:9-10.

Kumta hangne, ka donkam ka jingngeit bad ka jingiaineh ha ka kyrteng u khun u Blei u Jisu Khrist kein. “Lada phi iaineh!”.