Ki khyrdop beain, ki pynbudnam, ong ka EM KHADC

Shillong:Ka Executive Member In charge ka tnad Forest jong ka KHADC, ka kong Macdalyne Mawlong, ka la ong ba ka jingbuh ia ki khyrdop beain kiba khlem ioh bor, na kano kano ka tnad treikam jong ka KHADC ka wanrah ia ka jingpynbud nam ia ka tnad khlaw jong ka Council.

Haba ia kren bad ki lad pathai khubor na ka liang ka Kong Macdalyne, ka la ong ba ka jingbuh jong ka Council ia ka khyrdop ka long kaba shai, namar ba ki khyrdop jong ka KHADC ki don ia ki sign board, katba kiwei ki khyrdop ki bym don sign board ki dei ki ba shu khrong pisa beain na u paidbah.

“Lada ki paidbah ki lap ia kum kine ki khyrdop ki ba ym don kano kano ka signboard jong ka KHADC, ki dei ban pan ia ka jingpynshai ba ki dei ki khyrdop jong no bad ki briew kiba shah khrong pisa beain na kum kine ki khyrdop ki dei ban wan ujor sha ka KHADC, khnang ba ka Council kan lah ban weng mardor ia kum kine ki jingeh” la bynrap.

Ka la ong ruh ba kum ba la ju paw ba ki don ki jingujor, halor ki khyrdop jong ka KHADC man ka por, hynrei ka jingbuh ia kine ki khyrdop ka long ban kem ia ki kali ba kit beain ia ki mar khlaw bad kane ka dei ka hok ruh jong ka council ban dainkuna lane ban kem ia kum kine ki kam beain.