Balei mynthi U Amit Shah?

Babu Kular Khongjirem

Ka jingmynthi u Amit Shah ban kren ia ki nongsynshar ka Meghalaya ha ka por ba u wan jngoh ia ka Meghalaya ha ka 23rd u January 2021 ka la pyn lyngngoh bad dum buit hi ngain ym tang ia ki heh ki hain hynrei wat ia ki rit ki ria ruh kumjuh. Dei ban don ki dawbah dawsan balei u Amit Shah u khlem jubab wat tang shi kyntien ruh wat tang ban ong ‘hooid’ ne ‘Em’ ruh ia ki mat ILP,8th Schedule,etc wat la dep mynjur ia ki da ka Assembly jong ka Meghalaya.

Ha kito ki por ba khluid bha ka jingdawa ILP,khlem pat pyntip ne ia kren ei ei satia bad ki Union Cabinet ka Delhi,ki Seng Bhalang ki la ia sdang ban thang tyngshop ia ka dur bula u Amit Shah bad u Modi hangne ha Meghalaya.Ka jingthang tyngshop ia ki nongsynshar ka sorkar India ka lah ban pyndiaw bad pynsngewsih pynban ia u nongshah thang. U MP jongngi na ka seng Congress,i ma Vincent Pala ila sngewdei ban phah leit Delhi ia baroh ki 60 ngut ki MLA na Meghalaya.

Lada u MP Congress u don bynta(involved) ha ki issue ILP,ka sorkar NDA kaba shun thlong mluh thlong sying ia ka Congress kam sngewtynnad satia ban ialam u MP Congress ia ki 60 ngut ki MLA sha Delhi.Ka sorkar barim,ka MUA I bad MUA II hapoh ka jingialam ka Congress ka la dep rai skhem ban kyntait shi syndon ia ka ILP bad ym donkam ban ia kren shuh ia ka ILP bad ha ka jaka ka ILP,la pynmih thymmai noh da ka MRSSA bad ia kane la mynjur ruh wat da ki Seng Bhalang ha kito ki por.Mynta pat,kijuh ki Congress ki kyrshan tyngeh ia ka ILP da kaba kylla jutang biang.Ka NDA na Delhi kam sngewtynnat satia ia kum kine ki ‘riew kylla nongrim,tdong-tdong,khlieh-khlieh nawei shawei.Ka jingpynkhreh ka Assam ia ka general Election ka la pynktik ia u Amit Shah ban pynleit jingmut shwa ia ka Election meeting sha Assam bad ban shu ieh jyndat ia ki nongsynshar jong ka sorkar MDA ha Meghalaya namar um da phuida than ia ka Meghalaya kaba don tang 2 ngut ki MLA ka BJP bad tang kawei ka MP ha Lok Sabha bad uwei u MP ha Rayja Sabha.

Wat hadien bym kwah kren ne bym kwah ia kynduh u Amit Shah ia ki Cabinet Minister ka Meghalaya ruh,kiba kham dom bad kham pyni jingbitar tyngeh pynban ki dei ki MLA Congress kumba ngi la iohi na ki lad pathai khubor.Dang bun kiba ngin hap ia pyrkhat bha namar ha ka jaka ba ngin ioh nong na ka jingwan ki Minister Delhi,poi pynban sha ka jingduhnong kaba khraw bad ka jah burom khein burom nalor ka shah niew bein bad shah ibein pynban.