Ar taiew ai por ka KHADC, ia ka sorkar ban pdiang ia ka Bill

Shillong, 9 ‘lyngkot:
Ka KHADC ka la kyntu ia ka sorkar jylla ba ka dei ban pdiang noh ia ka Khasi Hills Autonomous District (Village Administration) Bill, 2014 hapoh ar taiew.
“Ngi kyrmen ba ka sorkar jylla kan leh ia kane ka jingkyrpad ka Council ban pyndep ia kane ka kam hapoh ka ar taiew kynthup ban phah pdiang ha u Lat ka jylla”, la ong u CEM ka KHADC Bah Adelbert Nongrum hadien ba la wai ka jingialang jong baroh ki party hynne ka sngi Thohdieng. Ia kane ka jingialang la khot da u CEM ka KHADC la wan ban iashim bynta da ki nongialam ka Congress, UDP, HSPDP, KHNAM bad ka MDC shimet ka Grace Mary Kharpuri.
U CEM u la ong ba kam don daw ia ka sorkar ba kan bat sah ia ka Bill kaba la pas la hynniew bnai mynshwa bad ka la dei ban pdiang noh.
“Lada ka sorkar ka sngew ba don kano kano ka jingduna, ka dei ban pynphai wut wut sha ka Council ym ban shu bat sah, khnang ba kan lah ban pynbeit ia ka jing duna. Hynrei ngim iahap ia ka jingshu sngap ka sorkar”, la ong u CEM ka KHADC.
U Bah Nongrum u la ong ba ka jingshna ia ka Village Administration Bill ka long kaba iahap bha khamtam hadien ba la mih ka rai na ka Kashari High Court ka Meghalaya kaba la sloit ia ka iktiar jong ki nongsynshar shnong.
Katkum ka jingong u Bah Nongrum, ka Village Administration Bill ka thmu ban pyniaid ban kdew ia ki kyndon ha ka rukom pyniaid ia ki shnong ki thaw, ki Hima, Elaka bad ban iada bad ban pynkup bor ia ki Dorbar Shnong katkum ka jingsain dur jong ki mynshwa.
U la ong ba um banse ban ialam ia ka kynhun ki MDC ban leit tynruh sha ka sorkar lada ka sorkar kam pdiang ia kane ka Bill.”Ngim don lad da kumwei pat lada ka sorkar kam pdiang ia kane ka Bill, bad wat ban kynduh ia u Myntri Rangbah”, la byrngem u CEM kaKHADC.
U Bah Nongrum u la kyntait ia ka jingmut banpynphai ia ka Bill banshna biang ia ka.”Ha nga shimet, nga hun ia kane ka Bill bad ka Council ka lapynlut lai snem tam ban shna ia kane ka Bill. Ngam iohi ba donkam ban shnabiang hynrei lada donkam ngin sa peit ban leh ia kaba donkam.”Ka jingthmu ba kongsan ha kane ka por ka long ba ka sorkar ka dei ban phah sha u Lat ba un pdiang ia kane ka Bill”, la ong u Bah Nongrum.