Suh khun ka sorkar MDA, ka kha pynban da u dkhan

Babu Kular Khongjirem

Myn shem taiew, ka iew ILPka thnem hi thui bad ka sorkar MDA bad ki Minister baroh ki la ia shongshit bha halor ka jingwan jngoh bad iuhkjat u Union Home Minister,u Amit Shah ban pyniaid ia ka meeting jong ka NEC ha Shillong namar u dei u briew u ban lah ban ai ne rai ei ei halor ka ILP, Ktien Khasi ha ka 8th Schedule,u pud u sam bad ka Assam nalor bun bah kiwei pat ki mat kiba ktah mat iong ia ka jaitbynriew jongngi.

Ka sorkar ka la lah ruh ban pynthanda jai wat ia ki Seng Bhalang bapher bapher halor ka jingpynthikna jongka ban ia kren ia u Amit Shah.Phewse, hadien ba u la leit phai noh u Amit Shah sha Delhi ki khlem ioh iakren ei ei ruh em ia u.Ki Minister kiba ju mlien ban kop pia bad kiba ju mlien ruh ka ktien ‘khlien la thang jwat la bam’ ki la shaiong bad kthang hi ngain namar u Amit Shah um salia, um patiaw bad um khein briew ei ei ia ka sorkar MDA bad ki Minister jongka.

Kane ka jingleh bym suitniew u Union Home Minister ia ka sorkar MDA ka la pynlyngngoh wat ia ki paidbah ba bun ba lang hi ruh.Ka long thik kum kato ka jingiathuhkhana na ka Phawer u Aesop shaphang ‘Ki Nongtuh,u Bieit bad u Sniang’ kaba ong ‘U lum u suh khun,u kha da u dkhan’.Ka jingshongshit shwa ban wan u Amit Shah te,yn nai iakren shuh,sngew kumba un wan rah bad kit syndon da ki Lum bah Himalaya nangthie ban wan ai sha Meghalaya,hynrei tang ban ioh ia kren tiak ruh khlem ioh pynban.Pulom ei kha ma kha ka jingkwah bad ka plan ka sorkar MDA bad ki Suit badb u ‘Neck Tie’ ba i khain bad i style ki Cabinet Minister ki lip rong lut namar ka jing bym iohlad ban ia kynduh ia u Amit Shah.U Amit Shah u phah wan pynban sha Delhi ia ki Minister bad ki Seng Bhalang.

Donbok ba ka sorkar MDA ka la khlem khot lang ia baroh ki 60 ngut ki MLA ban ia kynduh Amit Shah hynrei la nang kham i lehrain shuh shuh lada ka leh kumta.Hato! ki ia sngewdei ne em ban ia leit shaduh Delhi haba u wan ha ing lajong ruh um treh kren ia ki mat ba kongsan ka jaitbynriew? Hato, ia ki briew kiba ibein,niewbein bad bym khein snep iangi ka biang ne em ban leit nguh leit dem ia ki shaduh Delhi?

Ngi ieh ha ka jingstad ka sorkar MDA bad ki Seng Bhalang ba kin rai halor kata.La kumno kumno,dei ban wad noh da kiwei ki lad ki lynti ban pyn pei shkor ne pyn sngap ia u Modi bad u Amit Shah lym kumta ka jingphoh sniew ILP,8th Schedule,Border issues,etc kan long tang kum ka rngai ne jingphoh sniew ha Meghalaya jongngi .