Kylla ka trok, kaba kit umphniang diesel

Khliehriat: Kawei ka trok tanker kaba kit ia ka umphniang Diesel ka la kylla hapdeng Surok ha Um-Tyr-a, ha East Jaintia Hills mynta ka sngi U Blei.

Mar kylla kane ka trok, ka umphniang ka la hoit noh sha khyndew bad kiwei pat ki driver haba ki la iohi ia kane ki la mareh ha ryngkat ka borti, ki jarkin bad wat da ki bilor um ban leit pdiang ia katei ka umphniang bad bun kito kiba ioh ban rah da ki borti bad ki jarkin ki la ioh ban pdiang bun litre ka umphniang katba kito kiba ioh da ki bilor um ki la ioh tang khyndiat. Kane ka long katkum ka jingiathuh ki nongleit nongwan lyngba utei u surok bah NH-06.

Katei ka trok kaba don ia u No. NL01AD – 0676, ka la kit haduh 24 hajar litre ka umphniang bad hadien ba la wan ki pulit la beh lut ia baroh ki paidbah kiba pdiang ei ia ia katei ka umphniang bad ki paidbah ki la hap ban tong na kaba la tuid katei ka umphniang.

Haduh mynta ka miet por kumba 8:30 pm eiei ka umphiang ka dang hoit na katei ka trok bad ki paidbah ruh ki dang bun kiba tong umphniang na ki Nala.