Poi Delhi, 25 hajar tylli ki traktor; da ka back gear iaid u nongrep na Punjab sha Delhi

Ki nongrep kiba iakhih pyrshah ia ka ain nongrep jong ka sorkar India, kiba na Punjab, Haryana bad Uttar Pradesh, ki la nang tuid sha Delhi, na bynta ka jingthmu jongki, ban iaid paidbah ha ka sngi Republic.

Kitei ki nongrep, ki don mynta ha ki bun bun jaka, kiba don harud jong ka nongbah Delhi, ha kaba ki la nang ialum lang, lem bad kito kiba la don lypa, naduh ka 28tarik Naiwieng 2020.

Haduh mynta, ki don 25 hajar tylli ki tractor, kiba la nang poi na Uttar Pradesh bad na Uttarakhand, ong U Rakesh Tikait, nongialam ka Bharatiya Kisan Union (BKU).

Na shibun ki jingjia, uwei u nongrep na Punjab, u iaid shaduh Delhi, da ka gear kaba da dien bad katei ka dei kum ka dak, ia ka sorkar India, ba kan pynphai dien noh ia ka ain nongrep jongka.