Ka jingpang nongialam ha ka Congress

Ka seng Congress, ka don ha kine ki sngi, ha ka jingpang bad kata ka dei ka jingpang kwah nong ialam bad katei kajuh ka jingpang, ka trei kam ha ka jylla bad kumjuh ha Delhi ruh, ha kaba ka jingkwah nongialam, ka jubor bha.

Ha Meghalaya, la iohi, ba ki la sdang paw sa ki kyrteng kwah shuki President, hynrei katei ka shu sangem shapoh shapoh, namar ba ka sur jing ia beit, kam don satia ha ki nongialam bapher jong ka seng ha ka Jylla.

Ha Delhi ruh kumjuh bad la kynmaw ba ki la don da ki bun phew ngut ki nongialam ba rangbah jong ka seng, kiba la thoh sha ka Sonia Gandhi, na bynta katei ka ishu ban don ia u ne ka President ba pura bad katei ka la pynkhih tik, ia ka iing jong ka seng Congress, ha ki khyndiat bnai ba ladep.
Hynrei ka jingshisha, ka paw, na ki elekshon ba dang shu dep, ba ka Congress, ka donkam ia ka main rangbah, ba kan mih ban ialam ia katei ka seng ha ki khyndiat sngi, ki ban sa wan bad ki jing shisha, ki kdew ia ka elekshon ha Bihar, ha kaba katei ka seng, kam shym la leh bha, ka elekshon shnong ha Jammu and Kashmir bad wat ka elekshon ha Assam, kaba dang shu dep sha ki District council, bapher ha ki khyndiat bnai ba ladep.

Kumta, lada jia ba ki heh jong ka seng, ki sdang ban tep eit miaw; ka jing shisha, ka pyni, ba ka Congress, ka la sdang duh jait bad ka la tymmen eh bad kumta ka donkam ia ka oxygen, ban pynim biang ia katei ka seng, ha kiba kum kine ki sngi jong ka jing kutlad kaba khraw bad ha shwa ba kan mad sa shibun tylli ki elekshon ha u snem 2021 bad shakhmat bad kawei na kitei, kan dei ka jing tynjuh kaba khraw ha Assam bad kaba lah ban phalang ia ka thain shatei lam mihngi hi baroh kawei.

Ha Meghalaya, ngi tip shai ba ka don ka kynhun jong U Mukul Sangma bad nangta, ka kynhun jong U MaVincent Pala, kiba don ia la ka jong ka jong ka thong ban long kham halor ha ka jing pyniaid ia ka seng bad ka jing lah ban pyn iadei ruh sha ki heh AICC.

Lada dei lei, kumba don ka jingiakren, ba U Ma Vincent Pala, un wan noh sha ka sain pyrthei ka Jylla, ha ka elekshon MLA 2023; kumta ka jingdon ia U President, sha la ka jong ka liang, ka donkam shi katdei, namar un dei u khlieh, u ban jied ia ki kandidet MLA bad un don bynta ruh ha kaba thaw ia ka sorkar hadien ka elekshon.