Ka Congress, ka don la ka jong ka rukom pyniaid, ong U bah Ronnie

Shillong:U MDC jong ka Congress, u bah Ronnie V Lyngdoh ha ka sngi balang, u la ong ba ha kaba iadei bad jingjied ia u President na ka bynta ka Meghalaya Pradesh Congress Commitee MPCC bad kum juh ia kiwei ki nongkitkam ka congress party ka don la ka jong ka constitution.

“Haba ngi jied ia u President ne ki nongkitkam ngi don la ka rukom pyniaid (Constitution) bad ngin iaid katkum ka constitution jong ka party, ha kaba ka AICC kan ai ka jingbthah ia ngi ban jied ia ki nongkitkam jong ka party ha ka jylla, hynrei kumba ka long mynta kam pat don kano kano ka jingbthah na ka AICC ban jied ia ki nongkitkam kiba thymmai”, bynrap u Bah Ronnie.

Na ka liang jong u Bah Ronnie u la pynshai ba hadien ka jingieh noh jong u bah DD Lapang na ka liang jong ka MPCC, ka la thung noh ia u Dr. Celestine Lyngdoh kum u President ba shipor, ym dei ba la jied da ka elekshon jong ka party. U ong ruh ba ka Congress kan sa pynbeit ha baroh kawei ka ri India bad kumjuh ha ka jylla Meghalaya ha kaba iadei bad ki nongkitkam ba thymmai.

“Wat ka AICC hadien ka jingiehnoh kam jong u Rahul Gandhi, la thung ia ka Sonia Gandhi kum ka president ba shipor bad u ong ba lada ka la dei ka por bad lada don ka jingbthah na ka AICC ha ka jylla ruh ngin sa jied ia ki nongkitkam kiba thymmai”u la ong.

Ha kaba iadei bad ka jingkam jong ki katto katne ba ki kwah ia u Bah Charles kum u president u Bah Ronnie u ong ba kum ki dkhot jong ka party ryngkat ki MLA, MDC ki don la ka jong ka mon ka jong ki bad don kiwei pat kiba pynsngew ia kiwei pat ki kyrteng.
U la ong ruh ba kum ka seng kaba bud ia ka riti synshar paidbah, kino kino ki dkhot ki lah ban wanrah ia kino kino ki kyrteng ba ki sngewbit bad ngi pdiang sngewbha ia ka jingai jingmut jong baroh.

U bah Lyndoh u la pynpaw ba ban ong ba ka AICC ruh kam don President, kata te ka bym lah ban long namar ba wat ha AICC, ki don ki jingpyniaidkam bad ki kyndon ban iaid katkum ka constitution ia kaba mynta ki kam ki jam ki dang iaid shakhmat bad yn hap ban rai ia ki bor kiba na khlieh, kumba long lem ki party kiba heh kum ka BJP bad kiwei pat.