Shillong: U MLA jong ka seng Congress, u bah Process T Sawkmie u la kren shai, ba ka jingthmu ban kylliang ia u President ka Meghalaya Pradesh Congress Commitee (MPCC) kan dang shim por, namar ba kin hap ban ap shuwa haduh da ioh ia u nongialam ba pura jong ka All India Congress Commitee (AICC).
Haba iakren bad ki lad pathai khubor, ha ka sngi ba ar u bah PT Sawkmie u la iathuh ba ha ka sngi ba wan u AICC inchage jong ka jylla Meghalaya, u Manish Chatrath, ka la don ka jingpynpaw ba ki la kwah ban jied ia u president ba thymmai jong MPCC.
“Na ka liang u Incharge ka AICC u la kren shai ba mynta ym pat donbor ban pynkylla ia u President jong ka MPCC, namar ba ka rai kan dei na ka AICC bad ia kane yn sa shim ynda la lah ban jied ia u President ba pura jong ka AICC”,u la ong.
U bah Sawkmie u la ong ba ban weng ne thung ia uno uno u president ka MPCC, ha baroh ki jylla jong ka Ri, ka dei hapoh ka rai jong ka AICC bad khamtam ba na ka liang u MPCC president u Dr C Lyngdoh u la thoh da ka shithi ba u la kwah ban ieh noh ia ka kam kum u president, hynrei ha ka sngi ba wan u AICC incharge jong ka jylla, u khlem ioh ia ka shithi bad ba na ka liang u Inchage u la kren shai ba ka jingjied ia u President ka MPCC kan long hadien ba ka AICC ka la ioh ia u president ba pura.
U la ong ruh ba don na ki MLA Congress ki ba la pynpaw ia ka jingkwah jong ki ban jied ia u bah Charles Pyngrope kum u President ba thymmai ka MPCC bad kane ka dei ka jingsngew jong ki bad ki don ka hok ban pynpaw ia ka jingkwah jong ki, hynrei ki don na ki MLA ki bym kwah ban pynpaw bad ki don ruh ki ba shu shaniah tang ia ka rai jong ka AICC. Halor ka jingkynthoh u bah Prestone ba ka Congress ka dei ka ing ba la pra, u la ong ba mano mano ruh ki lah ban kynthoh, khamtam ba kane ka kam ka la mih madan, kumta ki don hok ban pynpaw ia ka jingsngew jong ki.
U bah Sawkmie u la ong ka jingwan u AICC incharge ka jylla ka dei ban pynkhlain ia ka party Congress na ka bynta ka election 2023 ha ka jylla ban ia kynduh bad ia syllok ia ki MLA ka congress party bad ban iakren halor ka jingkut noh ka samoi trei kam jong U President ka MPCC.
Phi don ban ong eiei?