Pynshai ka MBOSE ia ki jingmih khubor bakla ha kaba iadei bad ka eksamin SSLC

Shillong: Ka Meghalaya Board Of School Education(MBOSE) ha ka 15 tarik u Kyllalyngkot 2021, ka la pynshai iaka jingsaphriang jong ka khubor thok ba ka eksamin Secondary School Leaving Certificate(SSLC) kan sdang ha ka 6 tarik u Iaiong 2021 ka long kaba bakla.

Dang shen ki khubor thok ki la saphriang ha ki social media ba kane ka eksamin Secondary School Leaving Certificate(SSLC) 2021 kan sdang ha ka 6 tarik u Iaiong 2021 bad kan kut ha ka 19 tarik u Iaiong 2021.

Katkum ka jingkren u Joint Director ka Meghalaya Board Of School Education(MBOSE), u Donald Marbaniang u la ong ba ka MBOSE hi kam shym la pyllait jingtip eiei satia shaphang ka tarik jong ka eksamin Secondary School Leaving Certificate (SSLC) bad Higher Secondary School Leaving Certificate (HSSLC) katba ka Sorkar Jylla kam pat rai eiei. U la ong ba ki khubor kiba saphriang ha ki social media ki dei kiba bakla bad kiba thok (fake news). Shuh shuh u la ong ba ka MBOSE kan sa pyntip ia ka tarik eksamin jong ka SSLC bad ka HSSLC, tad ynda la rai ka Sorkar.