Rung ka khlam corona virus, sa ha u ice cream, hap shong kyrpang 1,600ngut ki nongtrei ha China

Mynta ka khlam corona virus, ka la poi sa ha ki jingbam ice cream bad ia katei la lap ha ki bynta ba shatei jong ka China.

Ka khubor jong ka Sky News, ka iathuh ba ki bor pyniaid Municipal ha Tianjin, ki dang wad ia shibun ki briew, kiba la ia kynduh bad kito kiba don ia katei ka jingpang bad kumjuh bad kiba trei ha katei ka kompeni shna ice cream ha Tianjin Daqiaodao Food Company, ban pynshong kyrpang ia ki.

Baroh ki jingbam, kiba la shna lyngba katei ka kompeni, la dep khang lut khoit ia mynta hi. Ki don lai tylli ki ice cream, kiba la shna ha katei ka kompeni bad haba la test, la lap ba ki dei kiba don ia ka khlam corona.

1,600 ngut ki nongtrei jong katei ka kompeni, ki don mynta ha ka jingshong kyrpang bad 700 ngut na ki, kim don ia katei ka jingpang, haba la dep ban phah test, katba ka jingtest ia kiwei, ka dang iaid shakhmat.