BALEI IA NGA

S.K.N

“Mei balei phi i khuslai bha …?” La buh jingkylli ka Rida
I Kmie i shu sngap shiphang bad i sa jubab
“Nga khuslai namar kaei kaba la jia..” Ka la jubab pat
“Namar jong nga…?” La kylli biang ka Rida
“Don shibun ki jingkhuslai ” la jubab ka Kmie

“Nga tip ba phi khuslai na ka bynta jong nga…” La ban ktien ka Rida
Ka Kmie ka la sngap shiphang bad hadien kata ka la khlei ha la ka khun.
“Ngam khuslai balei… Katne ka jingeh nga mad. Mynta na ka daw jong pha bad u Panah ruh ngam sngew nang shuh ban ong ne leh kumno kumno ruh. Ki sngi ki bnai ki la nang leit bad i khun ba pha pun ha kpoh i la nang heh nangsan ba pli. Kan sa poi ka por ruh ba phan kha ha kata ka por ngin ym lah buhrieh shuh..” La pynpaw ka Kmie da ka sur ba kren diaw bha.
Ki ktien ba ka Kmie ka kren ki la dung ngak ha ka mynsiem jong ka Rida. Mynta ka jingmut jingpyrkhat jong ka ruh, ka la sngew khia shisha kumba pynpaw ka Kmie.

“Mei ka dei ba ong ma phi… Te ngan leh kumno kein ngam sngewthuh shuh kaei kane ka jingim. Balei ia nga kumne?” La phai ktien ka Rida halor ki jingpynpaw ka Kmie
Haba ka Kmie ka la iohi ba ka khun ka la sdang sa ban jaw ummat, kumta ka la pyntngen noh.
“ih ka por hi kan sa batai …” La pyntngen ka Kmie
Hynrei watla ka Kmie ka la ong kumta ruh na ka liang ka Rida kam shem jinghun satia.

“Ynda poi kata ka por pat ngin leh kumno kein Mei..?” La buh jingkylli sa ka Rida
“Yn leh kumno ka por hi kan sa batai…” La jubab ka Kmie
“Ni ko Blei balei ia nga…. Ngan ong i khun jong no pat kein.. Uei u kpa i khun jong nga… Nga la leh pop palat kane ka dei ka bainong jong nga…” La kren diaw ka Rida ha khmat la ka Kmie.
Namar ka jingiakren ia kata ka bynta ki shi Kmie shi khun kim tip shuh wat ka por ban bamja ha kata ka sngi. Baroh ar ngut ki shu ia shong khui ha kamra thiah ka Kmie. Dei tad haduh ba ka kpoh jong ka Rida ka la pah kruk shi kruk ba ka sa kynmaw peit baje. Ka kyndit thret ban iohi ba ka por ka la poi sha ka ar baje nohsngi.
“Ade Mei ia ngin leit bamja noh mynta lah ar baje” pynkyndit ka Rida. Ka Rida ieng noh syndon nangta.
“Ia Mei…” La ong ka Khun
“Tip ngam sngew thngan nang bam pha..” La phai ktien ka Kmie
“Em ale wat ong kumta Mei..” La pynbor ka Khun
“To khie nang leit pha…” La jubab ka Kmie
“Em ale noh te”. La ong ka Khun
” To to ia..” La phai ktien ka Kmie
Ka Rida ka nang leit noh sha khmat.
Ka Rida ka nang pynkhreh pynkhrum ia ka ja na ka bynta la ka Kmie ruh. Haba ka kmie ka la wan ki sa ia bamja lang baroh arngut.
Kumta wat hapdeng ba bamja ia ka phang ba ki iakren kim pynkut.
“Mynta nga sngew eh bha ban rai la ngin ai kam noh ia u Panah jong pha sha ka shnong ne Sengbhalang ruh mano pat kein ban bsa ia ngi? Kane ka bam ka dih katne dei ba wanrah ma u bapli”. La pynpaw ka Kmie
“Hooid kein, baroh kaba jia dei hi namar jong nga. Ngam poi pyrkhat te Mei ban jia kumne. Artat dei namar ba phi hi ruh phim iathiah lang bad i bapli ha kito ki por. Dei ha kito ki por te ba i Panah i khuslai mynsiem bha. Imat i sa lehieid sa snoh bad shoh jingieid ia nga ruh..” Pynpaw sa ka Rida
“Ni ngam tip shuh ta ka daw nga ong. Nga pat ha kato ka por nga mut ba un kylla bamut na kaba leh jan eh tang bad pha namar nga i ha kito ki por ia nga um da niewkor bha shuh hynrei khop khop u snoh bad pha. Pha ruh kawei hi..” La ban ktien biang ka Kmie.
Ha kane ka sngi ki ar ngut shi Kmie shi khun ki poi sha ka ia tih daw bad tei pop iwei ia iwei pat.