Duwai ka KJCLF bad ki samla nongialam

Shillong:Ka Khasi Jaintia Christian Leaders Forum (KJCLF) ba la juh tip mynshuwa kum ka Shillong Khasi Jaintia Church Leaders Forum (SKJCLF), mynta ka sngi Palei 14tarik u Kyllalyngkot 2021, ka la pynlong ka jingduwai ba kyrpang bad ki Samla nongialam ba pher ha ka imlang sahlang.

Ia kane ka jingiakynduh la pynlong ha New Hope Restaurant, Central Ward, Shillong ha kaba la ioh ia ka jingiasyllok na u President ka Forum u Bishop P Lyngdoh, uba la pynsngew ia ki saw tylli ki mat ba donkam: 1. Ki Khasi ki long ka jaidbynriew kaba tipbriew tipblei – kiba sngewthuh ia ka jingiadei para briew bad kiba wad ia ka jingiarap jong U Blei Trai Kynrad. 2. Ngi dei kiba la ioh ia ka jingmut bad ka jingpyrkhat ia kaei kaba bha – ym tang ka jingstad jabieng, hynrei ka jingsngewthuh kaba long ka jingai kaba kordor jong U Blei. 3. Ngi don ka jinglaitluid jong ka mon ban jied bad ka bor jong ka jingkutjingmut, namar ka jingjop kam dei eh tang ha kaba sdang, hynrei kaba lah ban kot bad pyndep ia ka thong. 4. Don ka Bor ha ka jingialong kawei – ban ia long kawei ha ka mynsiem wat la ngi don ha ki kynhun ba pher. Ki nongialam kiba jop dei kiba pyrkhat bad aiti na ka bynta kiwei bad na ka bynta ka jaidbynriew, ym na ka bynta ialade shimet.

Nalor ki nongialam jong ka KJCLF, kiba la iadon ryngkat ki long ki nongialam jong ka KSU, FKJGP, JSU, HYC, HANM, CORP, COMSO bad kiwei de kiba la pynsngew ia la ki jingsngewkhia jong ki bad jingdonkam ia ka jingkyrshan ha ki jingduwai jong ki nongialam Balang bad ki longkpa ki longkmie ha ka Ri. La ioh ia ka jingduwai kaba kyrpang na U Apostle RR Khongkrom.