Sei tuh T.35lak, da ka jingsoi U Phadar

Shillong, 30 Nohprah:
U Phadar Pather Samkutty Issac jong ka Believers Church Umsaw, u la ujor da sha ki pulit ka Umiam ha ka 18 tarik mynta u bnai, ba u nong trei jong u, uba trei kum u Accountant, U Anil Tig ga u la sei ia ka pisa kaba haduh T.35 lak tyngka da kaba soi tuh ia ka jingsoi kyrteng jongu.
Hadien ba la tohkit, ki pulit ka Umiam ki la phah noh ia katei ka jing ujor sha ki pulit ka Laban PS kiba dei peit. La rejistar ia ka case ha Laban ha ka 22 tarik mynta u bnai bad hadien U Inspector B.K Mishra u O/C ka Laban u la leit ban wad ia utei u nong rungtuh ia ka pisa sha ka jaka kaba u la iathuh sha ki nongpyniaid balang, hynrei la lap ba katei ka jaka ba u ai dei kaba u shu ai thok.
Ha ka 23 tarik mynta u bnai ki pulit ba kynthup ia u OC ka Laban bad u IO, SI W.K Momin ki la leit sha Chattisgarh, kitei ki pulit jylla ki la poi shaduh ka shnong jong utei u briew uba sei tuh ia ka pisa phadar, bad hadien ba ki la khynra ki la ioh ban kurup T.13 lak tyngka na ka ing sah jong u.
La kem ia u ba ia shi para bad u, u Pankhrasius Tikka bad kham hadien, ha ka 27 tarik la kem pat sa ia u Anil Tikka da ka jingiarap jong ki pulit Kapu PS Chattisgarh bad la ioh kem na ka jaka ba u rieh tngen. La wanrah ia u Anil sha kashari jong u Judicial Magistrate !st Class, Dharam Jagad ha kaba la ai bor ia ki pulit ba kin tohkit ia utei uba la shah kem.
Hadien ka jingtohkit la lap ba u Anil u plie account thymmai ha Punjab national Bank , Shillong ha ka 16 tarik mynta u bnai bad u la thep pisa T.20 lak tyngka kaba dei na ka pisa ba u la ioh ban sei tuh na u phadar. Ia kitei ar ngut kiba la sha kem la wanrah sha Shillong ban pan bor ba kin shah tohkit namar kitei ki jingjia.