“Ka por ba nga don bad ka Congress, ka dei ka por ba sniew tam ha ka jingim”

Shillong:”Ka por ba nga don bad ka party Congress ka dei ka por ba sniew tam ha ka jingim jong nga” ong u bah Prestone.

“Ka daw kaba nga la rai ban ieh ia ka party Congress, ka dei namar ba ka rukom trei kam bad ka rukom ialam jong ka Congress party hapoh ka jingialam u Dr Mukul Sangma kam long kaba shai bad ka dei ka sniew tam ha ka jingim jong nga” ia kane la ong da u Symbud Myntri rangbah ka jylla haba pynphai ia ka jingkynnoh ka party Congress, hynnin ka sngi.

Haba iakren bad ki lad pathai khubor ha ka sngi balang, u bah Prestone u la ong ruh ba ha ka por ba ka Congress ka don ha ka bor u Dr Mukul Sangma u la pynkylla ia ka Secretariat sha ka Private Corporation ha kaba u la bat kum u Myntri rangbah bad kum u CMD ha Secretariat bad lada ong ma u kumno kumno ruh yn hap ban kohnguh.

U bah Tynsong, u la ong ruh ba tang ba ki shong ha ka liang pyrshah bad ban shu kynnoh ia ka sorkar jylla ba ka iohthiah kam long kaba dei, ki dei ban kynmaw shuwa ba ha ka por ba ki don ha ka bor kaei kaba ki la leh bad baroh ki paidbah ki tip shai ia kane.

Halor ka jing kynnoh ba ka sorkar MDA ka khlem lah ban thaw ki lad ki lynti ban pyniohkam ia ki samla, u bah Tynsong u la ong ba ka Congress kan ai da ka jingthoh ba kaei ka la dep leh halor kane ka bynta.

Haba ong ban pynioh kam ia ki khun samla kam mut ka kam sorkar, hynrei ka dei ban thaw ia ki lad ki lynti ban pynioh kam ha kaba ka sorkar MDA ka la wanrah ia ki investor ban ioh lad ki khun samla ban ioh kam ha ka jylla.
Halor ka jingkynnoh ba ka sorkar MDA ka khlem wanrah kano kano ka kam pynroi hapoh ka jylla, u la ong ba ia kane yn ieh ha ki paidbah jong ka jylla ba kin rai ha u snem 2023.