U Motphran ba mynshuwa, u ba nep, mynta uba lymbnep

Shillong, 29 Nohprah:
U Motphran u dei u mot teinam ba la tei ha ka por ka sorkar phareng, ban sah kynmaw ia ka jingaiti bad ka jinglen lade ki khla wait ka ri Khasi ha ka por ka thma bah ba nyng kong. Ka jaka ba la ieng utei u mot la tip kum ka Iewduh, kaba dei ka iew kyntang bad ka iew kaba heh tam ha ka nongbah Shillong.
U Motphran u dei u mot teinam ban sah kyn maw ia ka ki riewshlur kiba la tip kum ki 26th Khasi Labour Corps kiba la rah suloi ba ia khun kum ki shipai jong ka ri bilat ha ka por ba la khih ka thma bah ba nyng kong. Ka jingtei ka sorkar phareng ia utei u mot ka long kum ka jingai nam ia ki 67 ngut ki Khasi kiba la iap ha katei ka thma bah ba nyngkong, ha utei u mot ka don ruh ka jingthoh kaba la thoh ha ka ktien Latin kaba la thoh ‘ Dulce et decorum est pro patria mori’ kaba mut ‘sngewtynnad ban iap namar ka ri’. Ki phareng ki la ai kyrteng ia utei u mot kum u Mot France, hynrei namar ka jingshem shitom na bynta ki briew jong ngi ha kato ka por ban kynnoh France ki la khot ia u Mot Phran bad naduh katei ka por la tip ia u kum u ‘Mot Phran’.
Hajrong jong utei u mot la don ruh ka jing kieng kaba hap ban iaid na suin bad la ju tip ia katei ka jingkieng kum ka jingkieng Motphran, hynrei mynta la pynpra noh ia ka bad ym don jingkieng motphran shuh naduh ba la pynpra noh ia ka ha u nailur 2014, bad sah sa tang u mot uba ieng hapdeng ka jingker tawiar ki kali bad ki paidbah. Hynrei kyndit ban iohi ba mynta ruh ia u motphran la pynkhyllem noh bad la pynkylla sha u sha kawei pat ka dur, bad ia kane la leh dang ha kine ki khyndiat sngi kiba la dep ha kaba la tei da uwei pat u mot ha ka jaka u motphran uba la tei da ki phareng.
Haba phai sha ka jinglong ka dur ka dar jong u motphran ba mynshuwa la iohi ba la pynieng saw kyrdan ki maw bad ha kliar duh la pynwandur ha ka jingtei kaba nep bad la pynieng pat sa uwei u nar uba don ar thapniang uba ia syriem kum ka jingnoh rynjup ka tara jur. U Motphran ba mynta pat uba la shna thymmai u don lai kyrdan ki maw ba la tei kynroh, hynrei ka khlieh jong u pat ka lymbnep kaba ia syriem kum ka jaka mane blei ki Muslims ne ka Masjid.