Da ka iaid paidbah yn rakhe Kiang Nangbah ka MPUF ha Jowai Ka KHNAM da ka thang mombati ha Khyndailad

Shillong, 28Nohprah:
Ka Meghalaya Peoples’ United Front kum shi bynta ban kynmaw burom ia ka lyngkhuh sngi iap ba 152 u khla wait ka ri Jaintia u woh Kiang Nangbah bad ban kyn maw burom ia ki kam ba khraw jong u, kan pyn long ia ka jingiaiaid paidbah naduh na lad Kiang Nangbah Govt college shaduh sha library Mynthong Jowai ha ka 30 tarik mynta u bnai ha ka por 4:00 (saw) baje noh phai sngi .
Katei ka seng ka la khot ia baroh ki khun ka ri jaintia, ki sengbhalang ki rangbah shnong bad khamtam ia ki riew pyrkhat ka ri lum Jaintia ban ia shim bynta ha katei ka jingiaiaid paidbah khnang ba yn lah ban ia mir ia ki jingmut ba khraw jong u khla wait ka ri Jaintia bad na ka liang ka seng ryngkat bad ka jingai jingmut jong ki kato katne ki riew rangbah ka seng ka la rai ruh ban ai kyrteng ia kane ka sngi kum ka sngi Jaintia National patriotic day lane ka Jaintia day.
Ha kawei pat ka khubor, Ka Khun Hynniewtrep National Awakening Movement youth Wing kan pynlong iaka jingpynshai paidbah ka ban long ha stand Jaiaw Parking Lot, Motphran ha ka 30 tarik u Nohprah 2014 naduh ka por 10.00 haduh 11:30 mynstep, kum shi bynta na ka jingrakhe ia katei ka lyngkhuh sngi iap ba 152 u Kiang Nangbah.
Ha katei ka sngi kin don ruh ki riew shemphang ki ban ai jingkren, ha ka por 5:30 janmiet jong ka juh hi ka sngi ka Youth Wing KHNAM kan pynlong ruh ka jingthang mombati ha Khyndai Lad kum shibynta ban kynmaw burom ia u khla ka wait ka jaitbynriew.
Ka kyrwoh na ka KHNAM ka khot ka wer ia baroh ban ia don ryngkat lang ha katei ka sngi kum shibynta ban pynpaw ia ka dak ka jingburom na ka bynta U ne U Riewshlur uba la iap naka bynta ka Ri bad ka Jaitbynriew baroh kawei.