Bat bor u draibar, ia ka hep rit, da kaba pynheh tape hapoh kali

Nongpoh:Ha ka sngi Thoh dieng jong kane ka taiew baladep, ka la don kawei ka jingjia shah leh beijot ha Ri Bhoi bad kata ka long ba kawei ka khynnah 13 snem, ka la shah leh beijot ha uwei u rangbah briew, uba dei na kajuh hi ka shnong, hynrei uba la iohlok sha kawei pat ka shnong.

Ka jingtip kaba la iohlum halor katei ka jingjia ba shempap ia katei ka heprit 13 snem, la ong ba ka la jia ha ka por kaba ka dang wanphai na Iew ha ka por 3:30 ei ei janmiet, hynrei namar ba ym don kali kamai, katei ka heprit ka la leit noh da ka kjat ban poi sha iing.

Pynban ha kaba kum kata ka por, katba katei ka Heprit ka dang iaid marwei, utei u Rangbah uba niah da kawei ka kali, u la khot ia ka ban leitlang da katei ka kali jong u, pynban haba katei ka heprit ka la kyntait, u la patan jubor ia ka ha kali bad haba u la lah ban pynrung jubor, u la pynheh da ki jingrwai hapoh kali, khnang ba ki briew kin ym iohsngew ia ki jingpyrta iarap jong katei ka heprit.

Hadien ba u la lah ban patan jubor ia ka hapoh, utei u rangbah u la pynshang kylleng ki jaka bad u la batbor ia katei ka Heprit ha kawei ka jaka kaba kham kynjah.

Wat hadien ba u la dep ban leh ia katei ka kam pohjait pohrati, utei u Rangbah, uba kiba haiing jong katei ka Heprit, ki la iathuh ba u dei uba la tip kum u Teibor Mawlong, u dang iai pynshang ia katei ka Heprit na kawei sha kawei pat ka jaka bad khlem tip aiu ba un dang don jingthmu ban leh.

Ka jingdonbok ia katei ka Heprit bad kaba la lait ban phet na utei u runar, ka dei ha ka por kaba u dang sangeh ia ka kali bad tong um na kawei ka kor um kaba don ha kawei ka shnong ha Ri Bhoi, ha katei ka por katei ka Heprit ka la iohi briew bad ka la mih na kali ban leit pan jingiarap na arngut ki rangbah na kata ka shnong bad kaba la pynlong ia ka ba kam lait noh na utei u runar.

La iathuh ruh, ba wat ha katei ka por ba katei ka khynnah ka la leit ban pan jingiarap na kitei ki arngut ki rangbah, utei u runar u dang iai pyrshang ban tan biang ia ka hapoh kali, hynrei namar ba la mih mih briew bad ki Longkmie, u la kem ka tieng bad u la phet krad noh na katei ka jaka.
Haba iadei bad katei ka jingjia shah batbor ia katei ka Heprit, kiba haiing ki la dep ban ujor sha ki bor ka Ain pyrshah ia utei u runar bad kiba la kyntu ruh ia ki bor ka Ain ba kin thwet bad kem mardor ia u, da kaba ai ruh ka jingpynsaja kaba tyngeh.