Kular U SMR, ban iarap ba iap ki sniang, ki syiar

Shillong:U symbud myntri rangbah, jong ka sorkar jylla u bah Prestone Tynsong, u la kular ban pyrshang katba lah ban ai jingiarap ia ki nongrep halor ka jingiap jong ki sniang na ka daw jong ka jingpang kaba la suba ba ka dei ka African Swine Fever (ASF).

U Bah Tynsong u la kular ia kane ha ka jingleit iakynduh jong ka Hill Farmers Union (HFU) ha ka ophis treikam jongu mynta ka sngi.

Ka HFU hapoh ka jingialam jong u bah Commander Shangpliang President, bah Alfondbirth Kharsyntiew General Secretary, U Dr. Bremly WB Lyngdoh Adviser lem bad kiwei pat ki nongialam jong ka HFU na kylleng ka jylla ki la iakynduh ia u Bah Prestone bad ki la dawa ban siew bai lut ksan halor ka jingiap jong ki sniang, ban ai jingiada halor ka jingiap jong ki syiar bad kumjuh ruh ban pynbiang ia ki jingdonkam kum ka jingbam sniang bad ki doctor na ka bynta ban pynseisoh ia ka piggery mission.

Halor ka jingiap jong ki sniang u bah Tynsong, u la iathuh ba ym lah ban ai jingiarap, lada ki iap hi, lait noh tang lada la pyniap da ki trai ban iada na ka jingsaphriang kane ka jingpang. Hynrei ka seng HFU ka la ban jur ba dei ban ai jingiarap beit.

Kumta u bah Tynsong u la bthah ia ki ophisar jong ka Veterinary Dept. kiba la iadon lang ha kane ka jingiakynduh ba kin lum jingtip na ka jylla baroh kawei katno tylli ki sniang kiba la iap bad ka sorkar kan sa thawlad ban ai jingiarap bad ka lah ban long da ki sniang khun lada ym lah ban iarap da ka pisa.

Halor ka jingiap jong ki syiar u la iathuh ba u la khot iaka jingialang ban iapyrkhat halor kane khnang ban ai jingiada. U la bthah ruh ia ki opshiar ban iatreilang bad ka HFU naka bynta ban pyntreikam iaka piggery mission lyngba ki cooperative society bad u la bthah ruh ban pynkloi ban ban register ia kino kino ki society kiba kwah ban shim iaka skhim ri sniang.
Na ka liang jong u President bah Shangpliang u la ai khublei ia u bah Prestone halor kane ka jingdawa jong ka seng bad u la ong ruh baka seng ka kloi ban iatreilang bad ka sorkar naka bynta kino kino ki project ki ban ai jingmyntoi ia ki nongrep.