Iaid paidbah ka Pommura ban pyrshah jingsniew

Shillong, 21 Nohprah:
Ka seng samla shnong Pommura ha ka 18tarii mynta u bnai, ka la pynlong ia ki jing pynshai paidbah shaphang ki jingsniew ka kyiad, drok, shongkha khynnah, shongkha klumar, HIVS/AIDS ha iing Dorbar Shnong Pommura ha ka ba la wan ban ia shim bynta shitrhem da ki khynnah skul na ka skul Catholi, Skul Presbitarian, Balang Presbitarian, Balang Catholic Balang u Krist jingiaseng samla na ki Balang bapher bapher ki Nonghikai skul ki paidbah nongshong shnong ki kmie ki kpa, samla, FKJGP Pommura Unit.
Ha katei ka jing pynshai paidbah la pyn iaid da u Bah Yowanki Pale Rangbah Balang Presbyterian u ba long ruh nongai jingmut ka seng samla shnong Pommura bad la ioh ia ka jingkren Maitphang na u samla Bristar Mawthoh u Genl Secretary Seng samla shnong Pommura bad la kren lyngkot da u Bah Aiborlang Kharmalki Asst Secretary Shnong Poimmura bad la ioh ban batai bniah shaphang ki jingsniew ka kyiad da u 2nd Officer Incharge ka Mawryngkneng PS,bad shaphang ki jingma jong ka Hivs/Aids shongkha khynnah bad kiwei kiwei ki jingma la batai bniah da u Dr Kharduid u Officer ka Mawryngkneng PHC.
Ha katei ka jingialang la don lang ruh da u Bah David Nongrum u MLA ka Thain kum u kongsan. Ha ka jingkren u la ai jingiaroh ia ka seng samla shnong Pommura ka ba la pynlong ia katei ka programme ka ba kongsan bha ban pynsngewthuh ia ki paidbah shaphang ki jingsniew ka kyiad ka ba juh wanrah shibun ki kynrum kynram ha ki ba bun ki long iing ka jingshim noh tang shiteng por ka jingim ba kordor pyntroin ia ki jingmut jingpyrkhat jong ki khynnah samla ba dangkhie dang san bad ka wan rah shibun ki jingsniew lada la kyrni ka kyiad.
La ioh jingkren ruh na ki Nonghikai bad kumjuh na u samla Pynehborlang Mukhim secretary shnong barim kum u symbud Kongsan u ba la pynpaw ia ka jingkmen ka ba khraw haba u la iohi ia ki paidbah ki ba bun ha katei ka sngi ki ba la angnud shisha ban ratdiengkhong ia ki jingsniew khamtam ka kyiad khnang ban wanrah shuh shuh ki jingkylla ha ka imlang ka sahlang.
Hadien ba la wai ka jingialang la pynbud da ka jingiaid paidbah kum ka dak ban pyrshah ia kitei ki jingsniew, naduh na iing Dorbar shnong bad la pyngkut ha Madan Football Pommura, ong ka kyrwoh na u Bah Yowanmi Thahbah u Publicity Secretary Seng samla shnong Pommura.