KA THONG – KI LAD KI LYNTI

KA THONG – KI LAD KI LYNTI
(Ka Khubor u Khunlung Khristmas)
[Da u Collin Wanñiang]

Dang shen la khihwin ka Ïingdorbar-thawaiñ ka Ri India halor ka Sngi Khristmas – la kan dang long ka Sngi shuti ne em hapoh ka Ri. Kumba ka paw mynta, ka 25 tarik u Nohprah kan ïai sah kumba ka la ju long baroh shikatta. Tangba, ka Sorkar u Modi ka khot ka wer ïa baroh ki MP jong ka BJP ha ki 281 ki Konstitwensi ba ki mihkhmat ban kynmaw burom ïa kane ka Sngi kum kata ka “Good Governance Day” kum ka dak jong ka Jingaiburom ïa u Myntri Rangbahduh bamynshwa, u Atal Bihari Vajpayee, uba ka Sngikha jong u, ka hap ha kane ka Sngi. Uban maitphang ïa kane ka lynti, dei u Myntri Rangbahduh hi, u Narendra Modi uban pynleit por ïa lade ha kane ka sngi hapoh Nongbah Varanasi.

Kum ban shu kdew hangne ba ha ka Lyngkhuh Sngikha u Mahatma Gandhi (Gandhi Jayanti) ruh, kane ka Sorkar ka la buh ïa ka prokram ba la khot “Swachch Bharat”.

Kumno ki Khristan ki sngew halor kata ka “Good Governance Day” ha ka Sngi Khristmas? Lah ban don 3 kynhun: (1) Kito kiba sngew pyrshah jur ïa kum kata ka Jingleh. (2) Kito kiba sngew ba kam lei lei namar ka Khubor babha jong ka Khristmas ka dei hi na ka bynta ka Bha ka Miat jong ka Imlang Sahlang – Good Governance. (3) Kito kiba shong hapdeng namar kim shlan ban kyrshan ïano ïano – ki shu noh beit sha kata ka liang ba kham bun briew ba kham ïamynjur baroh baroh.

Manla uwei pa uwei u don la kajong ka pyrkhat pyrdaiñ. Ki kam baroh, la ki dei ki babha ne basniew ki dei ki soh jong ka pyrkhat pyrdaiñ. Kita ki kam, lada ki briew ki ïaileh shi ïaileh manla ka por, ki kylla long ki jingmyllien jingmyllen. Kum ban shu buh, ha ka Sngi 15 tarik u Nailar (Independence Day), lada ki Khynnah Skul ki ïaiduh shi ïaiduh ban kynmaw burom ïa ka ha la kijong kijong ki Skul na ka daw jong ka Pakhang shnong ne padan surok, yn ym slem ban poi kata ka por ha kaba kin sa kylla myllen noh ban tip ïa kane ka sngi kum “Ka Sngi pakhang shnong”.

Haba phai pat sha ka 25 tarik u Nohprah, kumno phin sngew lada ki Khunlung Khynnah kin ym tip shuh ïa ka kum kata “ka Sngi Khristmas” hynrei kum “ka Sngi bamdoh – bamkhana” lane kum kata ka “Good Governance Day”? Ñiuma, ka lah ban long ba ki Khunlung Khynnah hapoh Jylla Meghalaya kin ïaitip hi ïa ka kum kata “Ka Sngi Khristmas” namar ka kham sngewbang hi ha ka Jingsngew Jingsngap ban pynneh ïa kata ka Kyntien, lem bad ki Tamasa laiphew jait ha ryngkat ka bam ka dih bad ki Jaiñ ki Nep thymmai kiba wan bad kata ka Kyntien, tangba lada kin ym tip pat ba baroh kita, ki dei namar ka Sngikha “U Khunlung Jisu Khrist”!! Kumta, ka mih ka Jingsngewdonkam ban ai pateng ne ban sam lem jingtip sha kiba dang lung dang san lyngba ki Kmie ki Kpa, ki Bor pynïaid Skul, tt.
Baroh ki Jynthaw ki ïoh Jingnang Jingtip lyngba ka jingïasyllok lang bad kiwei, watla ki don ki Jinglong kiba ikumba ki wan naduh Kpoh Kmie. – Ki Khunlung, ha ka Jingstadbuit baluilui jong ki, ki tip kumno ban ïoh ïa kaba ki kwah na ki Kmie ki Kpa da ka buit ïam pynjaw Ummat.

Nangta haba peit sa sha ka Jinglong jong kiba la heh la san. – Kim kwah ban pyni ba ki bakla ha kaei kaei kaba ki leh; ka don beit ka Jingbatai pynshai ban pynksan ïa lade. – Ki Kynhun kieng atiar, haba ki pynïap wat ïa ki baluilui, ka ikumba ki pynksan ïa kata ka Jingleh ka jong ki da kaba ong ba ym don da kawei pat ka Lynti ban pynbor ïa ka Sorkar. Ka Jingjia ha Pakistan dangshen ha kaba bun ngut ki khynnah skul ki la duh noh ïa la kajong ka Jingim ha ka jingdusmon jong ki lehnoh, ka lam kdew sha kata. Nangta, u President Bush jong ka Amerika ruh u la ngeit skhem ba um shym la leh eiei kaba bakla haba u la synreit Bomb ïa ka Iraq namar ka dei ka kamram ka jong u ban ïaleh pyrshah ïa ki kam lehnoh – kam pher la ki Paid Raïot baluilui ruh ki duh ei ïa la kijong ki mynsiem bakordor ha kata ka Jingthmu babha jong u.

Bunsien ka jinglongbriew ka pynleit jingmut tang ha ka Thong, khlem da peit pat ïa ki lad ki lynti ban poi shata. – Namar ka Thong ka Jingthmu ka dei ka babha, kumta ngi pyrkhat ba ka Lynti ba ngi shim ban poi sha kata ka Thong ruh ka dei ban long ka babha. Phewse, ha ka Phareng ki shait ong: “The end does not justify the means” – Kaba mut ba ym lah ban pynksan ba tang namar ba ka Thong ka bha, kino kino ki Lad ki Lynti ba ngi shim ban poi sha kata ka Thong, ki bha lut.

Ka Jinglehkmen Khristmas ka pynkynmaw ïa uta u Khunlung uba pyni ïa ki Lad ki Lynti ban poi sha ka Thong. Une u Khunlung u batai pynshai thymmai shaphang ka Jingim briew. – Ka Pop kam dei tang ha ki Kam, hynrei ka sdang ha ka Jingmut Jingpyrkhat (Mk 7:20-23; Mt 5:28, 15:19-20). Kumta donkam ban rat dyngkhong ïa ka tynrai, ym myntoi ban khyllad tang ïa ki tnad.

Une u Khunlung uba ka Pyrthei ka kynmaw burom ïa ka Sngikha jong u ha ka Sngi Khristmas, u batai pynshai thymmai ruh halor ka Jingjynsur mynsiem: – (Lk. 17:10) “Ngi dei tang ki shakri, ngi la leh ïa kaba dei ban leh”- ka pyni ba lada uno uno u kwah ban leh kam isynei, ka dei namar u sngewtynnad ban leh kumta, ym da ka Jingbohkhoh kumba ka la jia ha ka jingim jong kawei ka Mem kaba la len ïalade ha shibun ki Jingsngewbha tang ban ïoh lum Pisa na ka bynta ki duk ki rangli jong ka dewbah Asia bad Afrika. – Ka la leh ïa kane naduh dang rit lyngba ka Jingbthah Jingsynran lem jong ka Kmie jong ka. Ha kawei ka por ka la ïoh wan ïuhkjat ha India bad ka la leit peit ha kawei ka Kyntoit slum. Ha ka jingkyndit, ka la ïohi ba marjan bad kata ka slum, la don bun ngut ki briew kiba la ïakhalai pynbyrngia bad pynlut Pisa ei. Kumne, ka la pyrkhat ha lade: “Balei nga la shu len ïalade na ka bynta jong ki, katba kine ki briew pat kim pyrwa eiei?” Kumta, ka la sngewdom sngewbitar ïalade bad ïa kita ki briew kibym pyrkhat eiei na ka bynta ki Para-ri.

Ha ka Jinglongbriew mano bym sngewbitar ïa kum kane ka apot? Phewse, ka Khubor jong ka Khristmas ka long: “U Blei u ieid ïa uba ai jynsur da ka jingkmen” (2Cor 9:7). To ki Sengbhalang, ki Riewshimet bad ki Seng bapher bapher kiba ïanoh synñiang ha kane ka Aïom Khristmas na ka bynta kito kiba kham donkam eh, wat ym duh Jingkyrmen lada don kita ki bym kheiñ snep bad bym sngewnguh wat hadien ba ki la ïoh Jingïarap na phi. “Uwei pa uwei na phi, u dei ban noh synñiang kumba u la thmu ban noh; ym ha ka Jingshah pynbor..” (2Cor 9:7).