Leit khang ka KSU, ba khlong maw na Malidor

Shillong:Ka Khasi Students’ Union (KSU) Narpuh Circle, ha ka 30tarik Nohprah, ka la hiar kyrkieh sha Malidor namar ka jingioh jingtip na ki trai shnong ba ki nong Assam da ki phew ngut ki la wan khlong maw beaiñ biang na kane ka wah Malidor kaba dang hap hapoh u pud u sam ka jylla Meghalaya.

Ka seng, tang shu dep leit buh syntiew ha u Motdur u Kiang Nangbah ha Khliehriat namar ka dei ka lyngkhuh sngi iap ba 158 snem u khlawait ka jaid bynriew u Woh Kiang Nangbah, ka seng hapoh ka jingialam u Bah KS Suchiang President, bah S. Bamon General Secretary lem bad ki dkhot ki la leit hiar mardor sha katei ka wah Malidor ba don ha khappud bad ka jylla Assam. Ka seng ka la lap shisha da ki phew ngut ki khar Assam ki khlong maw beaiñ na katei ka wah bad ki la thep ha ki kali jong ki. Ka seng mardor ka la bthah ia kitei ki khar Assam ban pynhiar kloi ia kitei ki maw bad beh krad syndon ia ki bad maham ba kim bit shuh ban wan mushlia ne leh baheh shapoh u pud u sam ka jylla Meghalaya.

Lah ban pynkynmaw ba dang ha kine ki khyndiat bnai ba la dep, mynha ka 8 tarik September, ka seng ka la dep beh krad ia ki khar Assam ba wan khlong maw na katei ka juh ka jaka bad ka seng ka la ia kynduh ia u DC Bah FM Dopth ha ka 10/08/2020 ha kato ka por, hynrei ka long pat kaba lyngngoh ba kumno kitei ki khar Assam ki nud biang ban khlong maw beaiñ na katei ka wah, imat ki bor synshar district ki khlem leh eiei ne kim nud saham ha khmat ka sorkar Assam. Ka seng ka kynnoh ruh ia ka jingtlot treikam ka tnat forest kaba don ha Umkiang, Apha Range kaba dei peit ia kito ki area. Kumno katei ka tnat kam iohi mo, ne ioh don eiei sha lyndet. Ka jingnud ki nong Assam ban khlong maw na katei ka jaka, ka dei namar ka i poh ia ka sorkar jylla Meghalaya bad ka dei ruh ka jingthmu sop sop ban ioh kyntur pud bad ban ioh knieh ia ki jaka.

Ka seng kum shi bynta ban iada ia ki jaka puta, u pud u sam ka khyndew ka shyiap, ka seng kan leit ia kynduh biang ia ki bor synshar district (District Administration) ia u DC ba thymmai bah E. Kharmalki ban buh ka jingdawa ban leh da kaba tyngeh pyrshah ia ka sorkar Assam namar ka jingbym burom kylliang ia u pud u sam bad ka jingpynkheiñ ruh ruh ia ki kyndon iada mariang, ne ka Environment Protection Act 1986, namar ki doh um kim don shuh ki la duh jait.