Ka mat Themmetor ka dang im,ngi khlem iohthiah, ong u Chairman ka HLC

Shillong:U Symbud myntri rangbah ka jylla, u ba long ruh u chairman jong ka High level Commitee u bah Prestone Tynsong, u la ong ba halor ka mat Themmetor na ka liang ka sorkar jylla ka wad ia ki lad ki lynti ki ban weng ia ki jingeh shirta.

Haba ia kren bad ki lad pathai khu bor, u bah Prestone, u la ong ba halor ka mat Themmetor ka sorkar ka wad ia ki lad ban weng ia ka jingeh shirta bad dei na kane ka daw ba ka sorkar ka la thaw ia ka High Level Commitee.

U la ong ruh ba ka HLC ka dang iakren halor ka mat Themmetor bad haduh mynta kane ka mat ka dang im; ka HLC ka khlem iohthiah bad ka khlem ieh, hynrei ka dang wad ia ki lad ki lynti ban weng ia ka ne ka jingeh.

U la ong ruh ba ki bun ki mat kiba dang hap ban bishar bha ha kaba iadei bad ka Themmetor bad kawei na kine ka long halor ka jinglong trai ia katei ka jaka. U la ong ba na ka liang ka sorkar ka kyrpad ia ki synjuk ki rangbah shnong, ki paidbah bad ki seng bhalang ba kin iai shah bad ka jingpyniaid jong ka sorkar jylla.

U la iathuh ruh ba hadien ka jingsoi ia ka jingiateh hapdeng u Syiem ka Hima Mylliem, ka KHADC bad ka sorkar jylla; ka HLC kan sa shong biang ia ka jingialang bad kan sa aiti noh ia ka kaiphot sha ka sorkar jylla, halor ka rai ia ka Them metor.