Lap ia ka met U Dolloi, Elaka Nartiang, ba sdien phasi

Jowai: Hadien ka jingjah rngai u Dolloi ka Elaka Nartiang u ma Hepsing Dhar na ka jingthwet ki Pulit halor ka jingkynnoh ba ula leh ïa ka kam khlem akor ïa kawei ka longkmie na ka shnong ïonglwit Nongjngi kaba la jia ha ka 30.11.2012, hynrei mynta ka sngi U Blei la lap ïa ka met jong utei u Dolloi ba la sdien ha u tyllai phasi ha kawei ka jaka ba long lum ba don ki diengkseh kaba ki khot ka Pdeiñ Mukhim ka jaka khappud hapdeng ka shnong Wahiajer bad ka Mupliang West Jaiñtia Hills District.

Ka kynhun ka Crime Scene Unit (CSU) lem bad ki Magistrate ki la hiar mar mar sha katei ka jaka na ka bynta ban leh ïa ka jingtohkit halor kane ka jingjia, ha kaba na ka liang u Superintendent of Police ka West Jaiñtia Hills District u Bikram D. Marak u la ïathuh ba ïa kaiphot kaba ïadei bad kane ka jingjia yn sa lah ban pyntikna tad haduh ban da dep leh ïa ka Postmortem lyngba ki Doctor hashwa ban aiti noh sha kiba haïing hasem.

Halor kane ka jingjia na ka liang ki Rangbah shnong ka Nartiang u ma Mom Phalangki ula ïathuh ba hadien ka jingjah rngai u Dolloi ka Elaka naduh ka 3 tarik u Nohprah mynshem snem, na ka liang kiba haïing jong u ruh ki la leit pyntip ïa kane sha ki nongïalam shnong ha kaba ka shnong naduh ka 14 tarik u Nohprah, 2020 ki la pynlong ïa ka jingwad shong ïa utei u Dolloi hynrei ym shem la lap ïa u.

Dei tad hynnin ka sngi Saitjaiñ 2 tarik uwei u khynnah uba don 16 snem ka rta ba ka shnong Mupliang uba la thmu ban leit kheit ïa ki kynja ‘Tit dieng’ na ki dieng kseh ha ka por janmiet, hamar kumta hi u la lap ïa katei ka met ïap ha u tyllai phasi. Hadien ba kitei ki nongïalam na ka shnong Nartiang ki la ïoh jingtip ïa kane ki la leit pyntip noh sha ki pulit ka Nartiang PS bad sha ka Ummulong PS na ka bynta ban leh ïa kaba donkam.

Halor kane ka jingduh ïa u Dolloi ka Elaka Nartiang uba dang bat ïa ka kam Dolloi tang kumba ar snem duna, u Waheh Shnong ka Nartiang u pynpaw ba kane ka long ka jingduh kaba khraw eh ïa ka Elaka baroh kawei bad ïa ki shnong ki thaw namar u Dolloi u long u khlieh jong ka Elaka uba peit naduh ki kam Pata, ki kam ñiam rukom bad kiwei kiwei de bad kane ka long ruh ka jingduh nong kumjuh ïa ka District Council ban pynïakhun biang ïa ka kam Dolloi.