Iaid pyneh rngiew ka CoMSO, ha ka sngi iap U Kiang Nangbah

Shillong: Ka Confederation of Meghalaya social Organisation (CoMSO) ha ka sngi balang, kum ka dak ban kynmaw burom ia ka lyngkhuh sngi iap kaba 158 snem jong u Woh Kiang Nongbah; ka la pynlong ia ka jingiaid pyneh rngiew ia ka jaitbynriew kaba la sdang naduh ka Polytechnic Mawlai bad pynkut haduh Motphran.

Kane ka jingiaid pyneh rngiew ia ka jaitbynriew ka long ruh kum shibynta ban pynrhem ia ka mynsiem ban dawa na ka sorkar pdeng ban ai jingmynjur noh ia ka Inner Line Permit (ILP) ha ka jylla Meghalaya.

Haba kren ha ka ne ka sngi na ka liang u bah Roykupar Synrem, u General Secretary ka CoMSO u la ong ba na ka liang ka CoMSO ka long kaba shai ba kan iakhun shakhmat khlem da kynran dien haduh ba ka jylla Meghalaya kan ioh ia ka ILP. U la ong ba kane ka jingiaid pyneh rngiew ka long ruh na ka bynta ki 60 ngut ki MLA ki ba la shah pynjem rngiew ha ka sorkar pdeng namar ba ka la leh bym suidniew ia ka rai jong ki, kaba ki la pdiang ia ka resolution hapoh ka ingdorbar thawain jong ka jylla.