Ha thup ka pyrthei yn rung U Aristone M. Ryndongsngi, kum u nonglap dohthli thymmai

Nongpoh:Watla ki don shibun kiba pynlong khana kamkai halor ka jinglap ba thymmai u Samla Aristone M. Ryndongsngi, ia uwei u jait Dohthli bym pat tip ha ka pyrthei, hynrei ha ka jing shisha hi ka long, ba utei u Dohthli uba la lap thymmai da utei u Samla, un sa rung ha ka thup jong ki Jait Dohthli ha ka pyrthei, namar baroh shikatta ym pat don ki Saiantis ha ka pyrthei, kiba la lap ne ban ioh kyrteng ia utei u Dohthli.

Kum uwei na ki samla, uba la biang ka kyrdan jingpule bad uba la pule kyrpang halor ki jait Dohkha, u Samla Aristone M. Ryndongsngi, na ka shnong Iewmawlong, u dei ruh u nongialam ka RBYF, Nongpoh.

Halor ka jinglap ia utei u Dohthli, haba kren bad utei u Samla, u la iathuh ba kumba ka long mynta ki don tang 48 ki jait Dohthli ha ka pyrthei, hynrei mynta kan sa kiew 49 jait, kata lyngba utei u Dohthli uba ma u hi, u la lap na kawei ka Wah kaba don ha Puriang, West Jaintia Hills District.

Utei u samla, u la iathuh ruh ba utei u Dohthli ba dang lap thymmai ha ka Pyrthei, la jer kyrteng ia u kum u Channa Aristonei bad katei ka nam ban ioh ia katei ka kyrteng kam dei kaba la shu leh tang dep, hynrei la hap ban leit ban pynshisha ha kiba bun ki jaka ka Pyrthei bad ka jingpynshisha ka ban pynthikna ka dei ha Port Blair, kaba la pynshisha ba utei u Dohthli u dei uba dang thymmai bad u bym pat lap da mano mano ruh.

Haba batai halor ka jinglap ia utei u Dohthli, u Samla Aristone M. Ryndongsngi, u la iathuh ba tang mar ia lap, ha kaba nyngkong u la ishankhmat bha halor ka jinglong jingman, kumta ban pynshisha ia kata pat, u la pyrshang ban phah jingtip sha kiwei pat ki Saiantis hapoh ka Ri ban pynshisha halor utei u Dohthli. Ka nam bad ka burom kaba u la ioh ka long namar ba baroh ki Saiantis ki la pynshisha ba utei u Dohthli ym pat don mano mano ruh kiba lap bad uba la iapher na kiwei pat ki jait Dohthli, kaba la pynlong syndon ia ki briew ba deipeit halor ki dohthli ba kin ainam da ka kyrteng ia utei u Dohthli.

Halor katei ka nam ka burom kaba u la ioh, u samla Aristone M. Ryndongsngi, u la ai ka jingkhublei sha ki kmie ki kpa, kiba la kyrshan bad pynheh pynsan ia u bad u la ai ruh ka jingkhublei sha ki Nonghikai kiba la hikai ia u lem bad ia baroh ki paralok, kiba la kyrshan met bad mynsiem ia u.