Ioh ILP, uba khlem kwah

U Amit Shah, myntri kam poh iing ka sorkar India, u lah ban dei lane u lah ban bakla, da kaba u ong ba ka Manipur, ka khlem pan ia ka ain inner line permit (ilp), hynrei ka ioh pynban ia katei ka ain bad lada ka long kumta, ka long noh, kumba ai ia ka wait, ha u bym nang ban pom, te ka la eh, ba un lah ban sa pom kat shaba lap.

Na kaei kaba ngi kynmaw; ka Manipur, kam ju sngap jar, ha ka jing dawa ia ka inner line permit, hynrei, ka la don ruh ka khep, ha ka por ka sorkar Congress, ba ki la dawa da ka rai jong ka iing dorbar, na bynta ban pyntrei kam ia katei ka ain ILP ha ka jylla.

Ka jingkren U Amit Shah, lada um bakla, na ka bor kynmaw jongu, ka la dei ka jing bakla, kaba jubor bha bad kaba u dei ban pynbeit, namar ba kano kano ka jingkren thok, ia ka mat kaba iadei bad u paidbah, ka don la ka jong ka bai nong (kham kloi), namar katei ka dei ka jingkren bym salia ia ka jing shem jingeh, kaba u paidlang ka Jylla, ula mad ha ka jing iakhih ban dawa ia katei ka ain.

Kam dei tang kata, hynrei, ha kajuh ka por, ka jingkren, ka long ruh, kum ka jingkren niewbein ia kiwei pat ki jylla ba marjan, kiba dawa lang ia katei ka ain, lada dei ia ka Assam (ha kaba ki la don ki kynhun kiba dawa ia katei ka ain), nangta ka Meghalaya, kaba la iai ban jur ia ka sorkar India, ba kan pyntrei kam ia katei ka ain, namar ba katei ka pyni shai, ba ka rai ia ka ILP, ka dei beit ka mon lah duh jong ka sorkar BJP na Delhi bad ym don mano mano ba lah ban saham, khlem ka jingsngew bit jongki.

Ka jingkren U Amit Shah, ka thew shai ruh, ia ka jingmut politiks kaba shynna bha, lada dei ha Assam lane kumjuh ruh ha Meghalaya; ha kaba katei ka long, ba lada ka Assam, ka mut ban ioh ia ki lad jing iada ia ki trai shnong, ka dei ban shaniah biang ia ka seng BJP, na bynta ka elekshon 2021, ka ban sa long shen ha katei ka jylla bad katei hi kajuh ka jingkren, ka thew ruh ia ka Meghalaya, kaba la lamwir jur, ban ioh ia katei ka ain bad ka ban long elekshon sha ka dorbar Jylla, ha u snem 2023.

Ki jingkren U Amit Shah, ki la biang ban pynkut noh ia ka lynnong jong ka jing iakren, ia kane ka mat, katba ka dang don ka sorkar BJP ha Delhi bad ka sorkar NPP ha Meghalaya; hynrei lada ka BJP, ka ioh lad ban ialam ia ka sorkar ha ka Jylla, lehse kan kham shai ka jingmut halor ka jing dawa ia ka ain ILP.