Mynjur ka kynhun myntri, ia ka jing shakri DTH ha India

Shillong:Ka Kynhun Myntri jong ka Sorkar Pdeng, ba la pyniaid da u Myntri Rangbah duh ka ri, u Narendra Modi, ka la mynjur ia ka jingtyrwa ban pynthymmai ia ki jingbthah ban ioh laisen, na ka bynta ban pynbiang ia ka jingshakri Direct- To- Home ha India.

Ki bynta ba kongsan jong kane ka rai ki long ba ia ka License na ka bynta ka DTH yn ai na ka bynta ka samoi kaba 20 snem ha ka jaka jong 10 snem kaba don mynta. Nangta la pynthymmai ia ka bai License na ka 10% jong ka GR sha ka 8% jong ka AGR. Yn khein ia ka AGR da kaba ot ia ka GST na ka GR.
Yn shim bai License ha ka nongrim kaba shisien man ka lai bnai ha ka jaka ka jingsiew kaba shisien shi snem kaba ju long mynta. Yn shah ia ki nongpyniaid DTH ban pyntreikam haduh 5% baroh ki channel jong ki, kum ki channel ba la ai jingbit ha ki rynsan. U nongpyniaid DTH un hap ban siew ia ka bai registration kaba T.10,000 kaba dei siew tang shisien bad kaba ym lah ban pynphai shuh na ka bynta kawei ka PS channel.

Yn shah ia ki nongpyniaid DTH, kiba mynjur ban iasam ia ka rynsan DTH bad ka transport stream jong ki TV channel. Ki nongsam jong ki TV channel kin ioh jingbit ban sam ia ki jingdon jingem na ka bynta ka Subscriber Management System (SMS) bad Conditional Access System (CAS) application jong ki.

U pud uba 49% FDI ha ki jingbthah ba mynta jong ka DTH yn pyniasoh lang bad ka polisi jong ka Sorkar (DPIIT) halor ka FDI kumba la pynkylla na ka por sha ka por.

Kane ka rai kan sdang treikam katkum ki jingbthah ba la pynthymmai halor ka DTH ba la pynmih da ka Tnat Information and Broadcasting jong ka Sorkar pdeng.

Kane ka jingpynduna ba la tyrwa ka thmu ban pynbeit ia ki kam siew bai license kaba iadei bad ki kam Telecom bad ia kaba yn pyntreikam. Ka jingiapher kan pynlah ruh ia ki nongai jingshakri DTH ban bei tyngka shuh shuh na ka bynta ban poi sha ki jaka ba thymmai ha kaba ki kam jong ki kin kham iar bad kin don lad ban kiew ha ryngkat ka jingkyntiew ia ki lad ban siew bai license na ka por sha ka por. Ka bai pynrung kyrteng ia ki rynsan ai jingshakri kan wanrah ia ka khajna kaba kot kumba T. 12 lak. Ka jingpyndonkam lang ia ki jingdon jingem da kito kiba pyntrei DTH kan wanrah ia ka jingpyndonkam bha ia ki jingdon jingem ha ki satellite kiba duna bad kane kan pynduna ruh ia ka jinglut jingsep jong ki briew baroh. Ka jingpdiang ia ka FDI policy kan wanrah shuh shuh ka jingbeit tyngka ha ka ri.