Ujor ka HNYF, ba khaii khaw sha Bangladesh

Shillong:Ka Seng HNYF, Shnongpdeng Unit kaba peit ia ka bha ia miat ka imlang sahlang jong kane ka thain ka la phah shithi sha ka BSF, Umpling, Shillong da kaba kdew katto katne ki jingujor kiba kane ka seng ka la lap ia ki kam beain kiba la ju pynkhein ha ki katto katne tylli ki jaka Border jong kane ka thain.

Ha kane ka shithi ka seng HNYF Shnong Pdeng Unit ka la pyntip sha ki bor ba dei peit ia ki thain Khap-pud ne ka BSF, ba ka la ju don ka jingkhaii tuh kaba shyrkhei ia u khaw ha lynter ki khap-pud jong ka Bangladesh kiba kynthup ha ki bynta jong ka Khasi-Jaintia District.

Ka HNYF ka pyntip ba ki jaka ba ju khaii tuh ki kynthup ia ka Lyngkhat, Pyrdiwah da kaba iaid lyngba ka wah Borhir kaba hap ha ka East Khasi Hills District, bad ha Jaintia Hills pat, kane ka jingkhaii tuh la ju pynlong ha ki thain jong ka Dawki-Bakur (Bakur Mandir), ka Riah Jalong bad ter ter shaduh sha Muktapur. Ka HNYF ka la ioh ruh ka jingpyntip ba kane ka jingkhaii beain la ju leh na ka por sha ka por khlem da don kano kano ka jingtuklar na ki bor ba halor bad namar kane ka la ialam sha ka jingduna jong u khaw ha kane ka thain ia uba ym shym la don kano kano ka jingmang ban shalan shabar na kane ka thain.

Kumjuh ruh namar kane ka la lam sha ka jingkiew dor jong une u marbam ha kine ki thain bad ha ka jylla hi baroh kawei. Da kane ka jingpyntip sha ki bor ba halor jong ka BSF ka seng HNYF Shnongpdeng Unit ka buh ka jingkyrpad ia ki bor ba halor ba kin shim khia halor kane ka kam beain bad ban teh lakam katkum ki ain ki kanun.