Wat kren na bynta ka sorkar MDA, ong ka MPYC ia ka CoMSO

Shillong: U General Secretary jong ka Meghalaya Pradesh Youth Congress (MPYC) u bah Fernandes Savio Dkhar, mynta ka sngi palei, u la kynnoh ba ka Confederation of Meghalaya Social Organisation (CoMSO) ka dei ban trei kum ka kynhun jong ki seng bhalang, ym ba kan long kum ka nongai ktien jong ka sorkar Meghalaya Democratic Alliance(MDA).

Haba ia kren bad ki lad pathai khubor na ka liang u bah Fernandes u la ong ba halor ka jingbuh jingkylli jong ka CoMSO ia ki nongialam jong ka seng Congress, ba ki dang artatien ha kaba ia dei bad ka jingkyrshan ia ka jingdawa ILP ha ka jylla, ka long namar ba ka jingbym kyrshan jong ka party Congress ia ka ILP ha ki por mynshuwa ka long ba ka jylla ka la don ia ka Land Transfer Act, ia ki District Council bad kumta ka jylla ka don kam tang ia ka ain ban ia da ia ka jingwan ki bar jylla.

Hynrei na ka jingwanrah jong ka sorkar pdeng ia ka CAB ia kaba mynta ka la kylla CAA, dei halor kane ka nongrim ba ka seng Congress ka la ai ka jingkyrshan kaba pura ia ka rai jong ka iing dorbar tnawain ban dawa ia ka ILP.

U la ong ba ka CoMSO kam dei ban peit khmat ia u nongialam ka liang pyrshah u Dr Mukul Sangma, namar ka nongrim jong ka seng ka long shai ba ki kwah ia ka ILP ha ka jylla Meghalaya.

Ha kaba ia dei bad ka jingkynthoh ka NPP Youth Wing ia ka party Congress, na ka liang jong ka MPYC ka kwah ban kylli hato ym long shuh ban kdew ia ka jingtrei kam bakla jong kane ka sorkar MDA bad ula ong ba na ka liang jong ka Congress kan nym sngap jar, hynrei kan kren bad iaid kren ba ki paidbah kin tip ia ka jingshisha.

U la kynnoh ba dei ka party NPP kaba la shet kylla ia u paidbah ha kaba u president ka party u Conrad K Sangma, u la ong ba lada pdiang ia ka CAB, ka NPP kan weng noh na ka NDA bad na ka NEDA, hynrei ka Agatha Sangma ka MP jong ka NPP ka kyrshan ia ka CAB hapoh parliament. Ka sorkar MDA kaba mynta kam lah ban pynioh ia ki nongtrei sorkar, kum ka arrear, ki nongtrei MeECL, MCCL, nonghikai SSA kiba khlem ioh ia ka tulop jong ki.

La ong shuh shuh ba ka jingkren ki nongialam ka NPP Youth wing ba ki MLA ki dei ban trei ha ki Constituency, ka long ka ba bakla namar ba ki MLA kim dei tang jong ka ki Constituency, hynrei ki dei jong ka jylla baroh kawei.