Wat batai lut sha ki briew ba nabar, haba ki wad jingtip halor ka thain Ryndia

Nongpoh:U Bah Mayrald Born Syiem, MLA Nongpoh, myn hynnin ka sngi u la leit ban iashimbynta ha ka 2nd Ri Kunai la Tynrai 2020, ka Tam asa kaba la pynlong da ka Nongtluh Eri Farmer Association (NEFA) ha Umden Parish Hall kaba don ha shnong Umden,Ri Bhoi.

Katei ka Tamasa kaba la pynlong da ka NEFA, ka dei halor ka nongrim kaba ki kwah ban pynpaw paidbah ia ka Riti dustur kaba la don da ki shnong kiba don hapoh jong katei ka Raid Nongtluh bad khamtam eh haba iadei bad ka jingthmu jong ki ban kyntiew ia ka kam Thain Jain Ryndia.

Nalor u MLA, kiba la donlang ha katei ka sngi, ki long naduh ki nongialam ka NEFA, kiba kynthup ia ka Kong Theresia Syiem, President nangta ka Kong B. Malai Adviser, ka Kong Mirajune Secretary, ki ophisar naka tnad Sericulture bad Handloom bad kiwei kiwei ryngkat ki longkmie ka thain Umden.

Haba iadei bad katei ka sngi, u Bah Mayral Born Syiem, u la ai ka jingiaroh kaba khraw eh ia ki nongialam ka NEFA, kiba la lah ban pynlong ia katei ka Prokram wat hapdeng ka khlam Covid-19, namar ka jingthmu jong kitei ki Longkmie ban iai bteng ha ka ban pynlong ia katei ka prokram, ka long ban pynneh pynsah ia ki riti dustur bad ki tynrai ba la buh naduh u mynbarim bad ki longshuwa manshuwa.

U Bah Mayrald Born, u la pynpaw ruh ba katei ka thain Nongtluh, ka dei kaba pawnam bha halor ka jingmih ki Jain Ryndia, kaba la thain da ki Longkmie kiba sah ha ki shnong kiba don ha katei ka thain, namar ym tang ba ki pynmih ia ki Jain Ryndia, hynrei ka dei ruh ka thain kaba khlain bha halor ka jingpynmih ia u Niangryndia.

Namarkata, utei u MLA ka Nongpoh, u la kyntu ia ki Longkmie kiba dei ki Nongthain Jain Ryndia, ba ki dei ban ri kyndong ia kaei kaba la batai da ki Longshwa manshwa bad kim dei ban batai lut sha ki briew bad khamtam eh sha ki briew ba nabar ka jylla, haba iadei bad ka rukom thain Jain lane ban khleh rong, namar lada kin batai lut sha kiwei ne ki briew nabar, ki lah ban shah knieh noh ia ka nam ka burom.

Kum u nongmihkhmat u Bah Mayral Born Syiem u kwah ruh ba ka sorkar kan ithuh kyrpang noh ia ka thain Nongtluh, kum ka thain kaba pynmih ia ki Jain Ryndia bad u Ksai ryndia.