Kyrshan U bah Sanbor, ban bteng U bah Hek kum u myntri, ha ka sorkar MDA

Shillong:Ki MLA jong ka seng Bharatiya Janata Party (BJP), kiba kynthup ia u bah Sanbor Shullai bad u Alexander L Hek da ka jingia sngewthuh jingmut lang ki la shim ia ka rai ba ha ka party BJP kan ym don ka jingkylliang ka shuki myntri haduh da kut ka samoi trei kam ka Sorkar MDA.

Haba ia kren bad ki lad pathai khubor na ka liang u MLA ka Shillong South u bah Sanbor Shullai, u la pyntip ba da ka jingsngewthuh jingmut lang la shim ia ka rai ba ha ka Party BJP kan ym don shuh ka jingia kylliang Myntri, haduh da kut ka samoi trei kam ka sorkar MDA.

U bah Sanbor u la ong ba ia kane ka rai la shim namar ba ka la sah sa tang 2 snem ban kut ka samoi trei kam jong ka sorkar MDA bad mynta ka la dei ka por ban iatrei shitom ban pynkhlain ia ka party BJP na ka bynta ka election ha u snem ban wan.

“Da ka jingia sngewthuh jingmut ngi la ia rai lang ban ai lad ia u bah Alexander Laloo Hek ba un long kum u myntri ka sorkar MDA haduh ka kut ka samoi treikam,”u la ong.