Pdiang ka Kong Patricia ia ka Doctor of Letters, na ka USTM

Nongpoh:Ha ka 6th Convocation-2020 kaba ka University of Science & Technology Meghalaya (USTM) kaba la pynlong myn hynnin ka sngi ha Central Auditorium, USTM, ka la pynkup burom na bynta kito ki samla pule, kiba la pyndep ia shibun ki jingpule ba kham sha jrong bad nalorkata, katei ka skulbah kaba don ha Baridua, ka la pynkup burom ruh ia ka Kong Patricia Mukhim, da ka kyrdan Doctor of Letters (Hon. D. Litt.) bad ruh ia u Prof Sanjay Deshmukh kum u Doctor of Science (Hon. D. Sc.).

Ka jingpynkup katei ka skulbah USTM, da katei ka kyrdan sha ka ka Kong Patricia Mukhim, kaba dei ka Editor u Shillong Times bad kaba dei ruh ka Longkmie Khasi kaba la iohpdiang ia ka Khusnam (Padmashree), ka dei halor ki nongrim jong ki kambah kaba katei ka Longkmie, ka la ioh ban nohsynniang ha ka imlang sahlang, kata ka long naduh ha ka kam thoh khubor, kaba nud ban kren beit ia ki jingshisha, watla ka dei ha ki kam kiba ma bad nalorkata kaba la ai jingshakri ha ka Pule puthi bad ruh ha ka thoh ka tar.

Haba iadei bad katei ka jingioh pdiang ia katei ka kyrdan, ka Kong Patricia Mukhim, ka la pynpaw ka jingsngewkmen kaba khraw bad ai ruh ka jingkhublei ia ka skulbah USTM, kaba la ithuh kyrpang ia ka halor ki kam kaba ka la shakri ha ka imlang sahlang.

Ka Kong Patricia, ka la ong ruh kum ha kane ka ri synshar paidbah, ngi dei ban kren ia ka jingshisha bad khamtam eh kum ka Nongthohkhubor, namar lada ngim kren ia ka jingshisha bad lada kum ki riew paidbah ngim kren ia ki jingeh sha ka sorkar mano ban pynsngew.

Ka la pynpaw ruh ba bunsien ka sngew long marwei, namar wat haba ka trei ia ki kam babha bad kaba don ia ki jingthmu ban pynbha ia ka imlang sahlah, hynrei ka la mad pynban ia shibun ki jingshah kynthoh kiba ha rukom.

“Kiba bun ki kynnoh ianga ba nga dei kata ka briew kaba pyrshah jaidbynriew, hynrei ha ka jingshisha hi ngam long kumta, pynban ki paidbah kim sngewthuh ia ka jingmut, namar naduh mynsiem hi nga don ia kata ka thong ban treibha bad ban ai ka jingshakri kaba bha tam hapoh ka imlang sahlang.

Kum kawei na ki Nongthohkhubor ba la slem bha, nga la mad ia shibun ki jingshah kynthoh, hynrei katta ngam tieng ne riej, pynban nangne shakhmat katba nga dang im hangne ha sla pyrthei, ngan iai trei na ka bynta ki kam babha bad ka ban long ka jingmyntoi ia kiba bun.