LANO PAT??

P.B.S

[ba bteng] La lut ki nongshad bad ka por ruh ka la miet, kata 11 baje lah lah. Shwa ban pynwai, u Headmaster u la kyrpad ia baroh kynthup lang ia ki nongpeitkai ba kin ia rwai lang ia kato ka jingrwai kaba ong “Ri Khasi Ri Khasi Nga ieit ia Pha”. Tang shu wai baroh ki la leit noh sha la ki iing ki sem da ka mynsiem kaba kmen.

Ha ka sngi kaba bud pat, la pynlong ia ka jingsam resol ha ka por 10 baje mynstep. Baroh ki khynnah skul ki la wan lut kumba la bthah da ka bor skul. Ha ka klas V la long nyngkong da ka Naphibiang na ki 40 ngut, na ka klas VI la long nyngkong da ka Sadalin na ki 35 ngut, bad na ka klas VII la long nyngkong da u Ksan na ki 30 ngut. La pynlong ka jingiathapkti kaba jam bha na baroh ki khynnah skul. Shwa ban pynbna shuti, la ioh ka jingsneng jingkraw na u Head jong ka skul. La pynbna ba ka skul kan plie biang ha ka 20 tarik Rymphang ha ka snem ban wan. Baroh ki la pass lut bad don ruh kiba la shu pynpas.

Ka shuti tlang ha nongkyndong ka la long ka lad jingiarap kaba khraw ia ki kmie ki kpa jong ki khynnah skul. Ki khynnah skul ha nongkyndong kim da kjit eh ia ka pisa jong ki kmie ki kpa namar haba ki ioh shuti tlang, shuti lyiur, shuti kyrpang, ki la ioh ka lad ban iarap ia la ki kmie ki kpa la ha iing ne sha lum. Ka shuti tlang lei-lei kaba palat 2 bnai tam kaba long ka jingkyrkhu ia ki kmie ki kpa. Na ka bynta ki bai skul bai kot, bai uniform bad kiwei kiwei ki la lah ban pynmih hi lada khein bha ia ka bai sngi ba ki trei ha la iing ne leit bylla sha ki briew. Ka kyrdan jingim jong ki, ka riam ka beit jong ki kim da kiew eh hynrei ka jinglong shi sur, ka jingim palei jong ki ka thain syrdoh ia ka long-briew man-briew jong ki.

U bah Sino bad ka kong Luda ki la kmen eh ba baroh arngut ki khun ki pas ha kata ka egsam kiew klas. Ha ka por dihsha sngi, u kpa u la kren ia ki kumne-
“U Bhalang un sa shong klas VII bad ka Syrpai klas VI la shem snem hynrei u Ksan un hap pep noh namar ngim kot bor ban phah skul sha Nongstoin ne sha Shillong. Tang ba u la nang ban pule, ban thoh bad ban khein jingkhein malu mala ruh ngi lah sngewsuk khyndiat ban ia kaba leit sha ki briew. U Bhalang pat lada u pas la shem snem lada sngewsynei u mama jong u uba sah sha sor un leit shong noh bad u ban bteng ia ka jingpule. Phi ki khun ba la kham heh phi la iohi ia ka jingduk jong ngi ki kmie ki kpa haba wat tang ka lum ruh hap ban shu wai. Nga duwai ba u Blei un kyrkhu pat ha la pateng-meiteng jong phi hadien habud” la kren u kpa da ka mynsiem buh jingkyrmen.

“To ieh kpa ia kata baroh ngi ieh ha ka jingibit jong u Blei. Lada ngi shu iai pyrkhat sah kan pynlynga pynpisa lynter ia ngi bad ka khate noh pynban ia ka koit ka khiah. Ka jingbun jingmut jingpyrkhat than kam pynbha hynrei ka khot sngewbha ia shibun ki jingpang” la ai jingmut ka menkmie.
“Hooid, kein, nga ruh nga sngewthuh kumta” la mynjur u menkpa bad u shim ia ka pela ban dih pynlut noh ia ka sha.

“Nga kwah eh ban pynnang pynstad ia ki khun tangba ka jingduk ka khanglad ia ngi. Imat ka daw ruh ka dei namat ba la ia bun eh. Yn pyrkhat tang ia kaei kein? sha Sor te, sngewmat kumba iathuh khana i kynum ki briew ki ia don khun tang 2 ngut 3 ngut eh. Kane ka pynlah ia ki ban kyrshan skul haduh ba kin da pyndep ia ka Degree ne Master Degree ne wat ban leit pule shabar na ka jylla lajong” la pynkut u kpa bad u ieng noh artat ban trei kam sha kper.
“To phi ruh khun leit trei noh la ka kam ka kam kumba ju trei. Nga ngan nang pynshet noh ka ja ka jyntah ioh lap ba thiah kine ki khynnah. Ka por ruh ka la dap 4:30 la ong ka kmie. [yn dang bteng]