BALEI IA NGA

S.K.N

[ba bteng] “To jubab Rida ia ka jingkylli jong nga balei pha shu sngap…?” La peit pynheh ka Kmie.

“Ha ka jingshisha ngam mut te mei kumta. Hynrei ngam poi pyrkhat ba ka long pynban kumne ba i Panah in nud ban leh ia nga kumne..” La phai ktien ka Rida

“Ngam tip shuh .. Ngan ngeit iano ..? Ka ba eh than mynta ka long i khun ha kpoh mano ban kit ban bah…?” La ban ktien biang ka Kmie
Ka Rida kam lait ang shuh ka la iam rangbah hangta, namar la dung eh ka ktien ka Kmie.

Ka jingiatai jong ki shaphang i khyllung ha ka kpoh ka la neh jlang. Hadien kata bteng sa ka jing byrngem ka Kmie ban beh noh ia u Panah.
“Ngan ym riej ngan beh noh ia u Panah jong pha. Ngam donkam lok ngam donkam tnga nga nang mut ban shngain ka iing ka sem pynban u wan pynjot pynpra kumne…” La byrngem ka Kmie.

Ka Rida ka la sngew sih bad nang iam pait dohnud. Ka la don shibun ki jingsngew hapoh ka mynsiem wat shaphang u Panah; hynrei kam nud pat ban ong ei ei ia kata. Tang kawei ka ba ka nud ban ong bad kata ka long
“Mei mab ia nga .. Balei ka wan jia kumne mo ia nga…. Ka jingpule, ka burom, shano…” La pynsawa suki ka Rida
Wat ka Kmie jong ka ruh ka la sngew synei lem ia ka kyntien ka khun. Kumta hadien kata la Kmie ka la shu sngap noh jak bad ka la sdang ban trei la ka kam ka jam.

Haba la sdang kem dum ka bneng u Panah u la wan iing bad u la rah ka doh ka kah, ki jingbam jingdih bad ruh u soh. Hynrei ha kata ka sngi um nud shuh ban ai tang ha ka Rida. U la shu buh hapoh almari.
Haba la saw tyngab ka bneng nyngkong eh khie shuwa ka Kmie bud sa ka Rida. Ka Kmie ka la sliw ding bad ka Rida ka la nang sar ia ka iing ka sem. Hadien ba la ih ka sha ka Kmie ka sa theh sha bad ki ia dihsha shi Kmie shi khun. Dei hangne ba ka Kmie ka sdang ban pur khana shaphang ka jingbym iohthiah.

“Balei pha khie step than…?” La kylli nyngkong ka Kmie
“Ngam nang iohthiah…” La iathuh ka Rida
“Phi pat Mei…?” La kylli kylla ka Rida
“Nga ruh pha khlem nang iohthiah” la iathuh ka Kmie
“Ni ka kam jong pha ka la buh jingeh bha ia ka iing ka sem, ngam sngew nang pyrkhat shuh..” La pynpaw ka Kmie
Ka Rida ka la sngewthuh ba ka jingpyrkhat jong ka bad la ka Kmie shaphang kaei kaba la jia ka poi hajuh.
“Nga ruh nga la babe jur Mei mynta. Ngam tip shuh kumno yn leh. Ka exam ruh la jan poi tip shuh” la pynpaw sa ka Rida

U Panah haba u iohsngew ia ka jingkren bnum bnum jong ki, u la nang pynshah shkor bha kliaw. U la iohsngew lut ia kaei kaei baroh kaba ki iakren. Kaba khatduh eh ba ki kren u sngew ba ka Kmie ka ong
“Lada ai shnong ruh isynei, kan long ruh ka jinghuri hura khlem pep ki pulit kin wan kem u paitbah shnong un mih ban bom ban shoh.. Kaba da eh than.. Ne pha ong kumno? Kane baroh ka jia dei ba pha ruh kawei hi ka bym khein snep ia nga.. Nga la i pher hi naduh ba phi ia leh kyrpang ia iaid sian, naduh ba u thied bam kyrpang nga la i shong pher. Hynrei pha pham sngewthuh..” La pynpaw ka Kmie
“Hooid, kein Mei, mynta nga la sngewthuh lut ba dei ka jingbakla jong nga hi…”
La ong ka Rida.
“Haba kumta ngin leh kumno pat kein…?” La kylli ka Kmie
“Mei kano kano kaba ong ma phi ia kata ngan kohnguh noh nangne sha khmat” la phai ktien ka Rida
U Panah u la sngap bha ban iohsngew pat sa kaei ba ka Kmie kan ong. Hynrei ka Kmie kam ong ei ei shuh pat.
Ka Kmie ka la shu ong “to ngin sa ia peit ..” Bad ka ieng noh nangta ban leit shabar. Ka Rida ruh ka sdang noh ban shet ban tiew.
U Panah haba u la ioh sngew ba ki la kut ka jingiakren u ruh ym slem hadien u khie noh na jingthiah namar ka por ka la don 7 baje. Ka Rida ka la pynkhluit ia u kitli sha na ka bynta u Panah bad haba u la rung ha kamra shet ka pyn theh sha ruh ia u. [yn dang bteng]