MRSSA: Lah kaba rim ne kaba thymmai?

Ka jaitbynriew, ha kine ki sngi, ka don ha ka jingsngew set op kaba jur bha bad kata ka long ba ki don shibun ki jingkwah, hynrei kam pat don kawei kaba ngi la ioh.

Ka sorkar India, ka la pynioh ia ka Sixth Schedule jong ka Consti tution, hynrei ia katei ruh (imat) ngim ia sngew skhem bha bad mynta ngi ia wad, ia kaei kaba ngi sngewthuh ba kan kham bha bad mynta ngi don ha ka wish list ia ka Meghalaya Resident Security & safety Act (MRSSA) bad nangta sa ka Inner Line Permit (ILP) bad nangta ia ka National Registration Certificate (NRC).

Ka ain MRSSA, ka don mynta ar tylli bad kawei ka dei kaba la pynlong ain da U Mukul Sangma, ha u snem 2016 (bad u dang kam trai haduh ha kine ki sngi) bad sa kawei pat ka dei kaba dang shna da U Sangma thymmai, U Conrad Sangma bad katei ka ain MRSSA, ka dang sahkut ha ka miej U Lat.
Ka sorkar U Conrad, ka kyntait ia ka ain jong U Mukul Sangma, ha kaba ki ong, ba ka dei tang ka ain kaba tuklar ia ki nongshong wai; hynrei ngi kynmaw ba ka jingbuh ia ki entry bad ki exit point lane ki jaka rung jaka mih, ka dei kaba la iakren hi, naduh ka por jong U Sangma barim.

Hynrei ka wan sa kawei ka mat bad katei ka long ba U Lat jong ka sorkar BJP, ha katei ka por, um shym la kyntait ia ka ain U Mukul, hynrei ki arngut ki Lat jong katei kajuh ka sorkar, kaba don ha Delhi, ki kyntait pat mynta ia ka ain jong U Sangma ka sorkar MDA bad hangtei ka don ka jing sngew kulmar jingmut, ba kumno kan don ka jingnoh shiliang ka tarajur jong ki laingut ki Lat ia ki ar ki Sangma.

U Sangma, uba rim ha kine ki sngi, u kren shai namarkata, ba ban ia kaba iaid khlem ain, lane kat bym pat ioh ia ka ILP, ka bha, ban pyndonkam da ka MRSSA, kaba u la thaw bad kaba la mynjur da U Lat ha katei ka por.
Sngew iahap shi rukom, ia katei ka jingmut ruh, ba lada ym ioh eh ia kaba thmu, la hap shu hun, kat ia kaba don ha kti.

Ka mat kan long kaba bang bha ban ia tuklar naduh u snem thymmai shakhmat, hynrei kan nang long shuh shuh kaba kham thiang ban ia ka ngap, namar ba mynta kin don lai ngut ki nong ia knieh burom ia kitei ki ain bad kitei kin kynthup ia U Mukul Sangma, ia U Conrad Sangma bad kumjuh ia U Satya Pal Malik, uba la sdang ban ia kynshur ha katei ka lain.