Ka sorkar, ka la shim khia bha, halor ka mat ILP, ong U SMR

Shillong:U Symbud Myntri rangbah ka jylla u Prestone Tyn song, ha ka sngi palei u la ong ba ka jingkynnoh na ka liang jong u nongialam ka liang pyrshah u Dr Mukul Sangma, ka long kaba ym don nongrim bad ka long kumba u la shukren tang najrong.

Haba ia kren bad ki lad pathai khubor na ka liang u bah Pres tone, u la ong ba ha ka jingshisha ha ka ba iadei bad ka Inner Line Permit ka sorkar naduh ba la pdiang ia ka Resolution ha ingdorbar thawain ka la dep ban phah sha ka sorkar pdeng ban pan jingmynjur ban pyntrei kam noh ia ka ILP ha ka jylla.

U bah Prestone u la ong ruh ha kaba ia dei bad ka ILP ka sorkar MDA ka la ialam ruh ia ki MLA sha Delhi ban kynduh ia u myntri kam pohing jong ka Sorkar pdeng ban ia kren ban ai jingmynjur noh ia ka ILP ha ka jylla bad ka jing kynnoh jong u Dr Mukul Sangma ka long ka bym don nongrim ha ei ha ei ruh.

Ha kaba ia dei bad ka Meghalaya Resident Safety and Security Act Amendment Bill 2020 ha kaba u Dr Mukul Sangma u la kynnoh ba ka sorkar kam kwah ban pyntrei kam ia kane ka ain; na ka liang u bah Prestone u la ong kat kum ka Principal Act jong ka MRSSA la dep pyntrei kam ia ka, hynrei halor ka MRSSA ka ba la dep pynkylla bad pdiang ha ka ingdorbar, la dep ban phah sha u Lat barim jong ka jylla.

Halor ka jingleit jong u Dr Mukul ban kyrpad ia u Lat ka jylla ban pyntrei kam ia ka Principal Act jong ka MRSSA u bah Prestone u la ong ba ka MRSSA kaba mynta ka long tang kum ka Tenancy Act ban shim ia ki kyndon ba donkam ka sorkar MDA ka la shim ia ka jingpynkylla ha u snem u ba la dep ha ka ba ki la pynrung ia ka kyndon Registration.

U la ong ruh ba ha ka por ba la ialam ia ka sorkar da u Dr Mukul Sangma, la shim ia ka rai ban wanrah hapoh ka MRSSA bad ha kane ka ain, ka don ka kyndon ban check ia ki kot ki sla kiba biang na ka bynta ki briew ba wan sha ka jylla bad la rai ban don ki entry point ha baroh kawei ka jylla bad haba wad bniah, la shem ba ka jingregister kam don ha ka MRSSA.

U la ong ba dei na kane ka daw ba la pynkylla bad pdiang ia ka MRSSA Amendment Bills 2020 ha ka ingdorbar thawain bad wan rah ia ka jingpynkylla bad ban pyntrei kam ia ka registration ha kine ki khyrdop entry point, bad kan iarap ia ki briew na shabar ka jylla bad ia ka sorkar jylla ba kan ioh jingtip ia ka leit ka wan bad ka shong shngain jong ki ha ka jylla.