Don jingeh aiu ban siew ia ka tulop ki nongtrei ka karkhana dewbilat ha Mawmluh?

Don jing-eh aiu ba ki bor pyniaid ryngkat bad ka Sorkar Jylla, kaba long trai ia ka karkhana dewbilat ha Mawmluh ban siew ia ka tulop ki nongtrei jong ka, ha kaba lah dap 15 bnai ba kim pat ioh la ka kamai umsyep, nalor kaba dang sah kut siew jong katto katne bnai, 5 snem mynshwa.

Hato kane kam dei ka jingthmu ba sha lyndet ban lilam ne die noh ia kane ka karkhana kaba lah pynieng naduh ba ngi dang dei lang hapoh ka jylla Assam ? Pynshah thngan shwa ia ki nongtrei bad ia ki khun ki kti jong ki bad ai daw ba ym don peisa, ba u saipan u lah thylli katba ban leh ba khraw, ban leh riewspah ki nongpyniaid bad kita kiba ngi la lah jied ban synshar hok te, long beit.

Lah u dewbilat lieh jong ki karkhana shimet kiba ioh myntoi na ka tax free holiday 7 snem bad subsidy kit mar kata, kat kum ki kyndon ka Meghalaya Industrial Policy ne u dewbilat iong ba shna ha Mawmluh ? Ha nga te, lah hi u dewbilat iong.

Ha ka jingshisha, ka Sorkar Jylla, lada wan mano mano ha ka bor, ka dei ban shim khia ban pynbha shuh shuh ia kane ka karkhana, pynkiew ka jingpynmih dewbilat jong ka, bad lada donkam, ia ki dang biang ka rta, dei ban pynshlur leit pyntbit shuh shuh ha ka kam shna dewbilat bad kiwei khnang ba kan long sha khmat ha ka jingtrei kam.
Hynrei imat, ym don ba sngew trai ia ka. Shu thet kti, shu tynrong jingkitkhlieh ia kiwei.
Ko Sorkar ki sem shiliang ki kup shiliang, shim da ka ram lada lah thylli ka iarong peisa hynrei siew noh mardor ia ka kamai umsyep bad kaba dang sah ban siew jong ki nongtrei ka karkhana dewbilat kaba don ha Mawmluh.
Pynbeit thymmai ia ka rukom trei jong ka tangba wat lilam ia kane ka karkhana kaba ngi lah ioh pateng na ka Jylla Assam ha ka por ba ngi lah mih iing noh na ka.

To ngin ym ieh tang ha ki nongtrei ban iakhih ryngkat bad ka shah thngan hynrei tylli lang baroh bad phi ki kynhun bad seng ba ju lam khmat na ka bynta ka hok uba bun ba lang, to ia ai ka kti ka mon ka kti ka diang ba kin ioh ia la ka hok bad ruh, ban nang pynbha bad kyntiew ia ka jingtrei kam bad jinglong kane ka karkhana.
Tylli, ngin ieng; saphred, ngin kyllon.

P. B. M. Basaiawmoit