Shah thngan khlem buh por, ki nongtrei MCCL, naba duh tulop 16 bnai kynthih

Shillong:Hadien ka jingbym patiaw jong ka sorkar jylla ban siewnoh ia ka tulop jong ki palat 300 ngut ki nongtrei permanent bad 150 ngut ki nongtrei casual ka Mawmluh Chera Cement Limited, kaba la don 16 bnai,ha ka sngi ba ar, 20 ngut ki nongtrei kane ka karkhana pynmih dewbilat, ki la wan kiew sha ka nongbah Shillong ban pynlong ia ka jingiakhih da ka ba shah thngan kaba khlem buhpor ha phyllaw jong ka ophis treikam ka MCCL.

Haba iakren bad u bah S.Lyngdoh u President ka Mawmluh Chera Cement Employees Union, u la iathuh ba wat hadien 3 sien ba ki la wan pynsngew ia ka sorkar jylla halor ka jingeh ba kim ioh tulop ka sorkar jylla haduh kine ki sngi ka shu sngap mynthi.”Ngi la wan ia kynduh ha u snem 2018,ha u snem 2019 bad mynta u snem ha ka 22 tarik u Naitung 2020 ngi la wan ban pynsngew ia kane ka jingeh, hynrei na ka liang ka sorkar kam shem leh eiei,” u la ong.

U bah S.Lyngdoh u la iathuh ruh ba la 16 bnai ki nongtrei ka MCCL ki khlem ioh ia ka tulop, ki khlem ioh ia ka jingsiew jong ka overtime naduh 2013, ki khlem lah ban pynheh tulop, naduh 2018 bad ka hok kaba ki dei ban ioh na ka bynta ka jingbha jong ki nongtrei.

U la ong ba ka jingbym lah ban pyntrei kam ia kane ka karkhana pynmih dewbilat kam dei ban ktah ia ki nongtrei, kumta ka sorkar ka dei ban shimkhia bad pyrkhat lang ia ki nongtrei ka MCCL.

U la kyrpad ruh ia ki bor ba dei peit ba ki dei ban wad ia ki lad ki lynti ban sdang ban pyntrei kam biang ia kane ka karkhana pynmih dewbilat ha kane ka thain, khnang ban lah ban weng ia ka jing eh jong ki nongtrei ki ba shaniah ia ka jakpoh na kane ka karkhana.