Jurip ka NHAI,MeECL ia ka jaka ban tei jingkieng nar ha Dwar Ksuid

Nongpoh:Ki briew ka National Highway Authority of India (NHAI), ha ryngkat ki briew na ka MeECL Umiam, hynnin ka sngi ki la leit ban jurip ia ka jaka kaba la thmu ban tei Jingkieng thymmai na ka bynta ki kali kitkhia ha Dwar Ksuid kaba don ha Shillong By-Pass, kata hadien ba ka Jingkieng kaba la pyndonkam baroh shikatta, ka la don hapdeng ka jingbymshngain na ka bynta ban iaid ki kali kitkhia.

Lah ruh ban kdew hangne, dangshen ka sorkar ha ryngkat ka ki bor ka NHAI, ki la shim ia ka rai ban aiti noh ia ka jingpyntrei ia katei ka Jingkieng Dwar Ksuid sha ki bor shipai, ia kaba la pynmang ban tei da ka Jingkieng Nar, kaba la pynmang ia ka jinglut haduh T. 300 Klur tyngka bad kaba yn sa pyndep tang ha ki khyndiat por.

Ha ka jingjurip kaba mynta ka sngi, hapdeng ki briew ka NHAI bad MeECL, ki la lap ba ha katei ka jaka kaba la thmu ban tei ia katei ka Jingkieng Nar, ka don jingwit haba iadei bad ki Post Ilektrik bad na katei ka jingjurip, ki la shim ia ka rai ba kin sa pynkynriah noh ia kitei ki Post Ilektrik sha ki jaka ba biang bad ban lait na ka jingpynthut halor katei ka jingthmu ban shna ia katei ka Jingkieng Nar.

Lyngba katei ka Jingleit Jurip, la lap ba kitei ki briew ka NHAI bad MeECL, ki la leit ban jurip ia ka jaka kaba la pyniaid ia ka Jingkieng rim ba mynshwa bad na katei ka jingleit jurip jong ki, la iohi ba kin sa shna ia kata ka Jingkieng na katei hi ka jaka, kaba la shna ia ka Jingkieng Nar kaba mynshwa.