Rev. B.P.Pohsngap
Ai khublei ia phi baroh, ha ka kyrteng U Nongpynim U Jisu Khrist. Bunsien bun sien la ju ia kren ia kata “Ka Shyieng Krung” ha ka long briew man briew don kiba ong bym ia dei “shyieng krung”.
Hynrei ka ain longkha long man shisien ba la ieit ia ka briew ym dei shuh ban iehnoh ia ka da lei lei ruh, lada lait nangta ka la dei ka Jingklim. Yn sa ia kren ia kata hadien. Ha ka jingshisha u briew bad ka briew kim dei u Adam bad ka Im kiba nyngkong namar ha shuwa ba U Blei Un shim kyrpang ia u Adam bad ka Im U la lah thaw shuwa ia ki briew Jen. 1:27, “Kumta U Blei U la thaw ia u briew ha ka dur jong U hi, ha ka dur U Blei kein, U la thaw ia u, shynrang bad Kynthei U la thaw ia ki”.
U Blei U la kyrkhu kyrpang ia ki ba kin nangroi nangkha bad kin Synshar ia ka pyrthei halor ka duriaw bad ryngkew baroh Jen.1:28, “U Blei U la kyrkhu ia ki bad U la ong ha ki, To da nangkha bad to da nangroi, bad to da pyndap ia ka khyndew, bad to da pyndem ngon ia ka, bad to synshar halor ki dohkha ka duriaw, bad halor ki sim bneng, bad halor kiei kiei ki kynja ba im baroh ba par halor ka khyndew”. U Blei U la ai ki jait jingbam ki jhur ki soh ba bun jait ia kine ngi la iohi bad ioh bam man ki aiom ngim ju duh shuh kiei kiei baroh, oh ainguh ia U Blei.
Ka mat kaba nyngkong: U la ai ka jingim ha ki. Kane ka jingim kaba U Blei U ai ha ki briew ka pher na ki mrad ki mreng ka pher na ki jingthaw baroh, ka long kyrpang haduh katta katta, namar kane ka jingim ka ban nym kut tang ha kane ka pyrthei, hynrei ban don ka jingiadei bad U Blei junom, la junom. Ki mrad ki mreng kim don kata ka jingim kum ki briew na kata ka daw ki shu im lymmuh lymmain shu ia long kha longman khlem ka ain ka hukum, ynda ki la poi ka por ban iap ki shu iap hi ym don jingkyrmen hadien. Ha kine ki sngi ki don ki briew kiba ia syriem ia ki mrad ki shu im ka jingim ka bym pyrkhat ei ei ia U Blei kim pyrkhat ruh ia ka bymjukut.
Nga ia kynduh ia kawei ka parabangeit , ani ka tei ki iing ki sem bun tylli nga la ong ia i peit katne katne phi tei ioh sha tei sha neng phim tei ei ei, i ong tip shuh phi ia kaba shatei khlem pyrkhat ei ei. U Blei hadien ba U la thaw ia u briew U la pyrsad ka jingim ha u briew Jen 2:7, “Bad U Trai Uba U Blei U la thaw ia u briew na ka dewmet ka khyndew bad U la pyrsad ha ki thliew khmut ki jong U ia ka jingpyrsad ka jingim bad uta u briew u la long ka mynsiem kaba im”. Kata ka jingim kaba ai ka jingshai ha ki briew kumno ban im. Ioan 1:4, “Ha U la don kata ka jingim bad kata ka jingim ka la ong ka jingshai jong ki briew”. Kat kum ka ktien U Blei u ban don ia kane ka jingim dei tang uba la ngeit ha U Jisu Khrist Uba U Trai, bad Uba la iaid Katkum ba U Jisu U la ai ka hukum ban iaid. 1 Ioan 5:12 “Uta Uba don Uta U khun u don kata ka jingim ; Uta u bym don U Khun U Blei Um don kata ka jingim”.
Ka mat kaba ar : U Blei U la buh ban nym shong marwei Jen2:18, “Bad U Trai Uba U Blei U la ong ruh, ym bit ba uta u briew un sah marwei; ngan thaw ia u ka nongsumar lem kaba biang”. Don bun ki briew kiba shong marwei hynrei ka dei kaba U Blei U buh kyrpang. Don kiba hap shong marwei na ki daw ba bniah palat bym ioh kaba thmu ne don ka daw Katkum ka jingkhein ka kur ne ka dustur. Don uwei u rangbah u la dep ia kut ban un iathoh bad kawei ka briew hynrei uwei pat uba na iing u leit Shongkha khlem da ia pynbeit lang ka kur, kumta ka rukom khein kha ka la kah noh bym bit shuh te u la shong marwei noh haduh kaba kut ka jingim ban long rang sotti.
Ka mat kaba lai :- ka jingthmu jong U Blei kaba maian shisha shisha hadien ba u la thaw shynrang bad Kynthei. U la shim kyrpang ia u Adam ban buh kyrpang ia u ha kper ka Eden Jen 2:8, “U Trai Uba U Blei ruh U la thung ia ka kper ha ka Eden shaphang mih ngi bad U la buh hangta ia uta u briew uba la thaw”. U Blei U buh ha kper ia kiei kiei baroh ban bit ban biang u briew uba U la buh kyrpang ha kper Eden. Hangne U Blei U la iohi ba um bit ban long marwei hangne ha kper. Dei hangne ngi iohi ba U Blei U thaw briew shisien pat da kaba u thmu kyrpang eh ia u bynriew ha pyrthei. Jen 2:21, “Te U Trai Uba U Blei U la pynngat ha U Adam da ka jingiohthiah kaba jur, u ruh u la iohthiah bad u la set la shim ia kwei na ki shyieng krung jong U, bad u la set pat da ka doh na ka jaka jong ka;” Lada ngi pule bnaih bad puson bha hangne ngin iohi kumba U Blei U sdang ia u briew bad ia ka briew ban pynlong kyrpang ia ki bynriew ha ka pyrthei; ba kin don ia ka jingim. Lada U Blei Um pynlong kumne lehse U briew un long tang u jingthaw ban shu ia don ha ka pyrthei khlem ka jingim. Kane ka briew kaba la thaw na ka shyieng krung ka dei ka jingim (Eve) ka mut ka jingim. Na ka ne ka thymmei ngi iohi ia ka briew (Eve) ka jingim (The first woman : made of man and for him) Jen 2:18 – 23. Ngim lah ban ong da kumwei pat ka briew (Eve) ka dei kaba U Blei U la thaw kyrpang eh ia U Adam (Red earth) kane ka maian u briew bad ka briew ka jingim kaba don ne im ha ka khyndew. Namar ngi long shynrang bad Kynthei tang ka dewmet ka khyndew.
Kane ka khubor kaba lam khmat ban ngin sa bteng kumno ban sngewthuh ia ka shyieng krung ha ka long kha ka long man. U Blei Un kyrkhu ngin bteng pat, Kumno ngin tip ia ka shyieng krung. AMEN.
Khublei shibun eh Pastor na ka bynta ki jingthoh jong phi shaphang ‘ ka shyieng krung u Adam’ ha ba phi thoh ba u Blei ula thaw ia u briew bad ka briew arsien, nyngkong katkum Jen:1:27 bad kaba arsien katkum Jen:2:7. Hynrei ha i jingsngewthuh i barit jong nga te u Blei u la thaw tang shisien hi ia u briew bad ka briew. Kaba ngi lah ban pynshong nongrim katkum u nongthoh (Moses) ia ka kitab Jenesis ha ka Jen:2:4 u ong ka jingiathuh khana shaphang ka jing pynlong ia ka bneng bad ka khyndew haba la thaw iaki ka long kumne. Ha kata ka sngi ba u Trai u Blei ula thaw ia ka khyndew bad ka bneng. Kaba mut u Moses ne u nongthoh u shu pynkynmaw ( repeat) ia ka ei kaba u Blei u la thaw ia baroh katkum ba la thoh haka Jen:1:1-28 hynrei ym ba u Blei u thaw briew arsien. Amen.