Da kaba tei iing, klun ka Assam ia ka jaka khappud ha Khanapara

Nongpoh:Wat la shipor la kham kynjah ki kam kyntur pud ka Assam ha ki bynta ka thain Khanapara, hynrei na kaei kaba la lap bad iohi, ka long ba ka sorkar Assam hi kam shym la shongthait ban kyntur ia u pud u sam ka Meghalaya, ha kaba kawei na ki sakhi kiba shai eh halor kane ka dei halor ka jingthmu tei Building ka da ka Assam ha kawei ka jaka ia kajia pud bad ka Meghalaya bad kaba hap hapoh ka shnong Khana para, Ri Bhoi District.

Ym tip la ka dei kaba shisha ne lait, hynrei na ka jingtip kaba malu mala, la ioh jingtip ba katei ka Building kaba la tei ha katei ka jaka, ka la dei kaba la tei da ka Assam State Transport Cooperation (ASTC) bad halor katei ka Building, la iohi ruh ba ka la don ka jingthmu ban tei ia ki kynja Building ha kawei ka jaka, kaba don hadien ka Khanapara Traffic Police ka Assam bad ia katei ka jaka la ker da ki tin, khnang ban lait na ka jingiohi ki briew bad ki nongleit nongwa.

Na kaei kaba la lap ha ka sngi kaba ki dkhot ka HNYF, Ri Bhoi, kaba la ialam da u Bah Marcus Marten, President ka HNYF, Ri Bhoi, ki la leit ban jurip ia katei ka jaka, ha kaba la lap ba ka Assam ka la thmu ban tei da kawei ka Building kaba heh, ha kawei ka jaka kaba baroh shikatta ka Meghalaya, ka kam ba katei ka jaka ka dang hap hapoh ka shnong Khanapara, Ri Bhoi.

Haba iadei bad katei ka jingtei Building da ka Assam ha katei ka jaka, u Bah Marcus Marten, u la ong ba ka seng ka sngewkhia eh ban iohi ia kine ki kam kyntur pud ba sop sop ka Assam, namar kham mynshwa katei ka jaka ka dei kaba dang hap ha Meghalaya, hynrei mynta pat khlem da tip ia ka duh ka dang, ka Assam da ka jingshlur ka la wan ban tei ia katei ka Building ha katei ka jaka bad kaba la wanrah jingma ne na kane ka kam kyntur pud ka Assam.

Haba iadei bad katei ka kam kyntur pud ka Assam ha katei ka jaka, utei u nongialam ka HNYF, u la ong ba kine baroh ki dei namar ka jingbymshimkhia ka sorkar ban iakren bad ka Assam halor u pud u sam, namar ha ka jingshisha hi, ki seng ki la iai pyntip na ka por sha ka por halor ki kam kyntur pud ka Assam ha katei ka jaka, hynrei ka jingleh mynthi ka sorkar Meghalaya, ka pynlong ia ka Assam ba kan shlur ia katei ka kam kyntur pud.

Namarkata, halor katei ka jingwan tei Building ka Assam ha Khanapara, na ka liang ka seng kan sa buh jingthoh sha ki bor pyniaid Distrik ka Ri Bhoi bad kumjuh ruh sha ki heh ka sorkar jylla, na ka bynta ban pynsangeh noh ia katei ka jingthmu wantei Building ka Assam ha katei ka jaka, kaba dang hap ha Meghalaya, u la bynrap.