La nang pyrkhing ia ki kali ha jingkieng Umiam

Nongpoh:Katto katne sngi ba ka District Magistrate, Ri Bhoi district, Nongpoh, ka la dep ban pynjari da ka 144 CrPC, kaba la maham ia baroh ki kali kitkhia kiba la kit palat ia ka 40 MT ba kin iaid lyngba ka Jingkieng heh Umiam, hynrei mynta pat la nangpyrkhing shuh shuh ia ka rukam iaid ki kali kitkhia bad kata ka long ba ki kali kiba la kit palat ia ka 20 MT kim lah shuh ban iaid lyngba katei ka Jingkieng.

La pynjari ia katei ka kyndon bad ruh ban maham halor ki kali kitkhia, ka dei namar ba katei ka Jingkieng Heh Umiam (Main Dam bridge, Umiam), ka dei kaba la slem palat bad namarkata lada iai bteng ban iaid ki kali kitkhia, ka lah ban wanrah jingma ia katei ka Jingkieng bad kumjuh ruh ia ki paidbah.

Ka DM, ka la kyntu ruh ia ki paidbah bad khamtam ia ki nongniah kali ba ki dei ban husiar haba ki niah kali hapoh katei ka Jingkieng bad kata ka long ba kim dei eh ban iabud marjan eh na kawei pat, hynrei ki dei ban iajngai kawei na kawei, khnang ba katei ka Jingkieng kan long shngain bad ban lait na ki jingjia ba sngewsih.