Nongpoh: Ki nongialam ka HYC ha Ri Bhoi, ki la pynpaw ia ka jingsngewkhia kaba jur eh halor ka jingsaphriang ki khubor kaba la wanrah ka jingiakynad hapdeng ki nongialam ka Seng bad u Bah Marcus Marten, President ka Nongpoh Region Auto Owners & Drivers Association (NRAO&DA), kaba la jia mynha ka 27 tarik u bnai ba la dep.
Haba kren sha ki lad pathaikhubor, kitei ki nongialam ka HYC, kiba kynthup ia u Bah Hercules Suting, President ka HYC, Bah Jason Lenox Nongrum, Vice-President, HYC Ri-Bhoi District, ki la ong ba kum ki nongialam seng, kim kwah ba katei ka jingjia kaba tang khyndiat kan nangiai bteng, namar haba iai bteng ban pynheh ia kiba kum kitei ki jingjia, ka wanrah ia ka jingjia burom ia Jaidbynriew bad khamtam eh ha kaba kum kane ka por ba ki paidbah hapoh ka Bri u Hynniewtrep ki kwah ban ioh ia ka ILP.
Kitei ki nongialam ka HYC Ri Bhoi, ki la ong ba ki long kloi ban panmad na u Bah Marcus Marten, President ka NRAO&DA bad uba dei ruh ha kajuh ka por u President ka HNYF, ha Ri Bhoi, nalorkata ki la ong ba ki panmab ruh na ka Kong Elizabet Marten, ka para trai u Bah Marcus Marten, lada ka la sngew ba ki dkhot ka HYC ki la kum ktah kti ia ka, kumba ka la mih ka jingkynnoh.
Kitei ki nongialam ka HYC, ki la kren shai ba kim shym la shoh ia u Bah Marcus Marten bad kumjuh ruh ia para jong u, hooid la don ka jingiania kaba malu mala bad ka jingiajrong kti jrong kjat, hynrei haduh u pud ban iashoh iadat kam shym la don satia.
Wat la katta, kitei ki nongialam ka HYC, ki la ong ba ki long kloi ban map markylliang bad ban panmad na u Bah Marcus Marten, namar kum ki nongialam seng ki sngew ba lada ym don ka jingiamab kaba markylliang haba don ki jingbakla, kan ym poi shano shano ruh bad khamtam eh para Khasi Khara, namar kum ki briew kin don beit ki jingduna.
Kum ki nongialam dei ban don ka mynsim sngewrit bad iamap mar kylliang kum ha kane kapor ngim dei ban peit shuh na kano² ka Seng ne ka Lama hynrei ngi dei ban ieng kawei ka Lama iada ri bad jait bynriw ban jop bad poi sha ka thong bad ban ioh ka hok ka jait bynriw jong ngi ……lada tylli kawei kim don shuh kiba ibeiñ bad kiba kren beiñ kren jot ia ka Ri bad jait bynriw jng ngi..
KHUBLEI SHIBUN
IM SLEM KHUN KARI