Pynrem ka HNYF, halor ka jingkynnoh khlem nongrim

Nongpoh:Myn hynnin ka sngi ki nongialam ka HNYF Northern Region, ka la pynpaw ia ka jingsngewkhia kaba jur bad kynthoh jur ia ki nongialam ka HYC, Ri Bhoi, kiba la kynthoh pyrshah ia u Bah Marcus Marten, President ka HNYF Ri Bhoi, ba u dei u nongialam ka seng uba pyrshah ia ka ILP bad kyrshan ia ka CAA.

U Bah Edilbert Nongrum, General Secretary ka HNYF, NR, u la ong ba kum kawei na ki kynhun sengbhalang kaba la trei shitom ban iakhun bad ban dawa pynioh ILP hapoh ka jylla ha ryngkat bad kiwei pat ki sengbhalang kiba kynthup ia ka KSU, FKJGP bad RBYF, ka sngewkhia halor katei ka jingkynthoh da ki nongialam ka HYC pyrshah ia u Bah Marcus Marten, President ka HNYF ha Ri Bhoi.

Utei u nongialam ka HNYF, u la ong ruh ba u Bah Marcus Marten, u dei u wei na ki nongialam ka HNYF u ba la ieng satar mynta la bun bun snem ban iakhun ban pynurlong ia ka ILP hapoh ka jylla, hynrei ha ka shi khyllipmat tang na ka huri hura hapdeng ki HYC bad nongniah Auto, u la shah kynthoh pynban ba u dei uba briew uba pyrshah ILP bad kyrshah CAA, ha kaba katei ka jingkynthoh da kitei ki HYC ka la ktah eh ia utei u Nongialam ka HNYF, uba dei ruh uwei na ki nongialam ba paw ha Ri Bhoi. U ka kynthoh ruh ba kitei ki nongialam ka HYC, ki dei tang ki khynnah suda bad ki bym tip ia kaei kaba la leh da ki seng kiba hakhmat bad kiba la mih na ka KSU, da kaba kular sha ki paidbah ba ki lah ban pynioh ban pyntreikam ia ka ILP tang hapoh khyndiat por.

Namarkata, halor katei ka jingkynthoh kaba khlem nongrim da ki nongialam ka HYC Ri Bhoi pyrshah ia u Bah Marcus Marten, ba u dei u ba pyrshah ia ka jingdawa ILP bad kyrshan CAA, na ka liang ka seng ka dawa na ki nongialam ka HYC ban pynshai paidbah bad ruh ban pan mab mardor ia u nongialam ka HNYF, u la bynrap.