Ka thain Marmain, ka dei kaba hap ha khappud Assam

Nongpoh:U Bah Balajied Rani, MDC Nongpoh, u la ong ba bun ki briew hapoh ka jylla kim tip ba ka thain Marmain ha Ri Bhoi, ba ka dei ka thain khappud bad kaba don ha syndah eh bad ka Assam lyngba ka thain Sunapur.

Utei u MDC Nongpoh, u la ong ruh ba ka daw kaba la pynlong ia kiba bun ki briew hapoh ka jylla ba kim tip ia katei ka thain, ka dei namar ba ki briew kiba sah ha katei ka thain khappud, ki im ha ka shongsuk shongsain bad ym ju don ka huri hura hapdeng ki briew na Meghalaya-Assam.

U Bah Balajied Rani, u la kubur ruh ba katei ka thain ka dang sahdien ha kiba bun ki liang, la ka long ha ki lynti synkien, ki jaka pule lem bad kiwei de ki jingdonkam da ki paidbah ha katei ka thain, kumta halor katei ka nongrim, utei u MDC Nongpoh, u la ong ba un sa iakren bha bad u MLA, na ka bynta ban pyrkhat kyrpang ia ki shnong khappud kiba don ha katei ka thain.

Na ka liang utei u MDC, u la ai ka jingkhublei kaba kyrpang ia ki paidbah bad nongialam shnong katei ka thain, namar ka jinglang jong ban pynneh ia ka shongsuk shongsain bad khlem da don kano kano ka jingiakajia pud hapdeng ki para paidbah, namarkata u la kyntu ia ki paidbah jong katei ka thain ba kin iaineh ha katei ka jinglong ne ban ia burom markylliang hapdeng jong ki, khnang ba ka shongsuk shongsain kan iai neh ha katei ka jaka.