Ki jingdonkam bakongsan jong ka West & South West Khasi Hills District ba kin kiew irat

Da u Bah Philip Marwein

Katkum ka jingkhein antad ( population projection) jong ka sorkar, ka jingdon ki khlieh briew ha ka jylla haduh ba kut jong ka snem 2020, kan long 34 lakh, kata kynthup lang ia ki Khasi-Jaintia, Garo bad kiwei ki jaitbynriew kiba la ioh long traishnong jong ka Meghalaya kiba don ha baroh 11 tylli ki district. Tang ka West Khasi Hills District bad South West Khasi Hills district ki khlieh briew ki la don 3.54 lakh bad 1.25 lakh lane kumba 5 lakh ngut duna. Katba ka jingheh ka area jong kine ka long kumba 5300 sq km. Hynrei, lada bishar bniah ia ka jingroi jong kine ki District hapoh kine ki 48 snem jong ka jingioh state ki dang duna palat lane ki dang sahdien bha ha baroh ki liang namar ka jingleh klet bad leh lyndet, jingbym suidniew ban don ka plan, ka thong ka mir bad ka jingbym iatylli hapdeng ki MLA, MDC bad ki nongialam jong ki shnong, ki hima, ki kynhun niam bad ki nongialam jong ki political party. Namar kine ki daw ki paidbah ki saphret saphrong bad ki District ki kylla lyngkrang.

Ki phang kiba hakhmat bad kiba dang duna palat ne dang sahdien eh ki dei ha ki lynti ki synkien bad ki surok kiba khohruh khohram, ki jingkieng kiba la tor bad don bun ki jaka ki bym pat don surok lane ki lynti ki synkien kiba paka (bad or lack of connectivity), ki lad pule puthi kiba madei mata (poor facilities and quality of education), ki lad bym ler ha ka liang jong ka koit ka khiah (poor health facilities and quality), ka umbam umdih ka bym khuid (low quality potable drinking water), ka ding ilektrik kaba duh Khah khah (interrupted power supply), ka kam ka jam bad ka bam ka sa kaba kyrduh (lack of employment facilities and food insecurity). Ban pynbiang bad ban pynjanai ia kine ki bynta jong ka roi ka par ngi donkam ia ka jingstad, ka jingtrei shitom bad ka jingiohi jngai jong ki MLA bad MDC, jong ki nongsynshar hima, jong ki nongsynshar shnong, ki nongialam jong ki kynhun niam bad ki nongialam jong ki political party jong ka West bad South West Khasi Hills District. Kaba donkam eh ka long ka jingiasyllok bha bad ban iasngewthuh jingmut bad ki paidbah, da kaba shonshap bad ban buhthong ia kine ki mat pynroi kiba kham kongsan eh. Ki bynta kiba kham hakhmat duh ki dei kine:

1. Ba ka PWD bad ka NHIDCL kan pyndep noh ia ka 70 km two lane road na Nongstoin-Rambrai-Kyrshai kam ia ka wah Khri (Kulsi) hapdeng ka shnong Kyrshai bad ka shnong Ukiam ban pei ha Chaygoan(Kamrup) u ba dei u thiedsnam bakongsan bha jong ka Ri Khasi sepngi. Lada ioh pyndep noh ia kane ka surok ka jingmyntoi ia ki paidbah bad kumjuh ia ka sorkar kan long kaba Khraw ha bun ki liang.
2. Ba ka PWD kan pyndep noh ia ka 92 km NH road Mawngab-Mawphlang-Weiloi-Mawkyrwat-Rangthong-Nongnah-Ranikor kaba dei u thied snam u ba heh u ba pyniasoh ia ka East Khasi Hills bad ka South West Khasi Hills.
3. Ba ka PWD kan pynurlong noh ia ka 75 km NH road na Nongstoin-Maweit-kulang-Nongjri ka ban iakynduh ia ka NH Mawngap-Mawphlang-Weiloi-Mawsynram-Phodumbah- Phodkroh-Ranikor- Nonghyllam& Nongjri- Khonjoi-Maheskola- Mahadew- Rongara- Baghmara. Kane ka surok ka long kum u thied bah u ba pyniasoh ia ka West Khasi Hills District bad ka South West Khasi Hills District nalor ba ka iakynduh ia NH ba mih na East Khasi Hills kaba poi sha South Garo Hills.
4. Ba ka PWD kan pyndep noh ia ka 38.5 km intermediate NH road Riangdo-Umsohpieng-Hahim ban iasoh bad ka Hahim- Boko road ( Kamrup).
5. Ban pyniar, siang rong bad ban maramot noh ia ka surok Intermediate NH na Nongstoin-Nongjyllieh-Kynroh- Nonglwai- Pombriew-Laitjynrai-Rangblang Sohsyniang-Myriem-Umdohlun-Wahkaji-Phlangdiloin bad ban bteng ia kane ka surok na Phlangdiloin sha Ranikor khnang ban iakynduh bad ka two lane road na Mawphlang- Weiloi-Mawsynram-Umpung-Phodkroh-Ranikor-Nongjri-Maheskola-Mahadew- Rongara-Baghmara. Kane ka surok ka long u thied snam u ba heh bha jong West Khasi bad South West Khasi Hills. Une u thied snam u pyniasoh naduh West, South West bad East Khasi Hills bad u ai snam ia bun spah tylli ki shnong jong kitei ki District, khamtam ia ki shnong jong ka international border bad ka Bangladesh.
6. Ba ka PWD kan pynlong noh ia ka surok Mairang- Nongkhlaw- Dongki ingding- Patharkhmah- Jirang – Rani Godown sha ka two lane road ban stet bad suk ka leit ka wan bad ka kit ka bah ba kan plie lad ha ki bynta kiba bun ki jingmyntoi.
7. Ba u Chief Minister, Conrad Sangma, un plie noh ia ka Community and Rural Development Block ha Rambrai ba la aiei ia ka jaka ha Rambrai- Nongkroh. Kane ka jaka ka long pdeng bha bad ka dei kum ka kmie jong bun spah tylli ki shnong kiba hap hapoh ki jaka Nongphlang bad ki jaka Rimen ha ka hima Rambrai bad ka hima Myriaw. Ia kular ia kane da u Deputy CM ha ka por ilekshon, mynba u la leit ialap elekshon ha Rambrai.
8. Ba u Health Minister, u Bah Alexander, un pynurlong noh ia ka Maternity bad Children Hospital ha Nongstoin ha ka jaka ba la don ka Civil Hospital barim. Kane ka long kaba donkam eh ha baroh kawei ka Khasi sepngi.
9. Ka Industrial Training Institute (ITI) ha Nongstoin ha kaba yn buh ia baroh ki Trade bapher katkum ka jingdonkam jong ka por hapoh ka Khasi Sepngi, ka long kaba donkam eh ha kane ka juk. Kane kan iarap shibun ban pyntbit ia ki samla jong ka Khasi Sepngi ban plie ki lad ban ioh kam lane ba kin ieng ha la ki kjat. La iathuh ba mynta ka don ka kynjia ITI barit ha Nongstoin hynrei kam pat lah satia ban ai jingmyntoi ei ei ia ki samla ha kane ka thain sepngi namar

ka don tang shi Trade ne ar trade ei ei.

10. Halor Ka Health : Ban pynlong 100 jingthiah ia ka Civil Hospital ha Nongstoin, ban don noh ka Blood Bank bad ban plie noh ia ka GNM Nursing School hajan ka Civil Hospital Nongstoin ka long kaba donkam eh. Ki don bun ki Health Sub-Centre bad ki PHC ha West bad South West Khasi Hills District kiba la ibit bha ban kyntiew kyrdan noh ia ki. Ka Nonglang PHC, Rambrai PHC, Maweit PHC, Riangdo PHC, Aradonga PHC, Nongkasen PHC, Ranikor PHC bad Mawthawpdah PHC; Nangta ki Sub- Centre kum ha Nongjri, Seinduli, Kyrshai, Mawdoh, Byrki, Mawdumdum, Mawlieh, Mawkhiat bad ban buh sub-centre ha Langpih, ha Tiniang, ha Mawkapiah, ha Phodumbah, ha Rising bad ha Langdongdai ki long kiba donkam eh.
11. Ka PHE: Ha kaba iadei bad ka umbam Umdih la donkam ba ka PHE kan pynbha ia ki pipeline ba poi sha Pariong, Mawkyllei, Nonglait, Kyrdum, Mynni Mawbri, ban pynpoi um ha shnong Tynrong Mawsaw, pynbha ia ka jingai umbam ha Seinduli, ban plie Sub-Division PHE ha Riangdo, ban ai Umdih ha shnong Risiang, Mawpon, Riangpoit, Maweitksar, Nongmynraw, Mawlangriang, Riangpoit, Umiang, Umtynru bad kiwei ki shnong jong ka thain; ban ai um noh ia ki shnong ha thain Rambrai, ia ki shnong ha thain Langpih, ha thain Byrki, ia ka shnong Nongkhlaw (Nonglwai area) bad bun kiwei ki shnong ki bym pat ioh umbam umdih kiba paka.
12. Ka Border Scholarship: Ba ka sorkar MDA ba mynta kan sdang noh ia ka skhim Border Scholarship ia ki samla pule ki ba wan na ki thain border jong ka Meghalaya – Assam, ym tang ia ki samla kiba wan tang na ki shnong border bad ka Bangladesh.
13. Ka Ophis u Engineer Urban: Ba ka sorkar MDA kan kyntiew noh ia ka kyrdan jong ka ophis Assistant Engineer Urban sha ka ophis jong u Executive Engineer Urban, Nongstoin.
14. Ka Ophis DMR ha Nongstoin: Ba ka sorkar MDA(Meghalaya) kan buh noh ia ka tnat ophis jong ka Mineral Resources (DMR) ha Nongstoin.
15. Ka Tourism: Ka don shibun ki jaka ba itynnat bha ka mariang ha kine ki District West bad South West Khasi Hills. Kane ka sorkar ba mynta (MDA) kan kynto bad bthah ia ka Tourism Department ban da leh tyngeh ban pynthikna ba Tourism ha West bad South West Khasi Hills ruh kan roi kan san kloi da kaba pynlut peisa ban shna ia ki surok kiba bha ban poi sha ki jaka ba don ki lum bad ki syntai lum, ki krem, ki wah, ki pung, ki kshaid, ki riat, ki khlaw, ki mrad, ki sim ki doh, ki kper syntiew bad kiwei kiwei kiba kordor bad kiba itynnat ba la kyrkhu da U Nongthaw ha ka Mei mariang jong kine ki District. Ha kajuh ka por ki Trai jaka jong kine ki jingai u Blei, bad ki paidbah kyllum, kin kniewkor bha ia kine ki jingai u Blei, bad kin iasnoh kti lang bad ka sorkar ban kyntiew ia ka jingroi ka tourism.
16. Ban buh Police Out Post: Ka jingbuh police ha ki jaka kiba donkam ka wanrah ia ka jingshngain bad ka iarap ruh ia ka

shongsuk shongsain. La donkam ban pynskhem bad pynklain ia ka Police Out Post ha Langpih, ha Athiabari bad ban buh ruh ia ka Entry bad Exit Point, ban pynkhlain ia ka Kyrshai O.P, ha Nongshram OP, ha Malangkona, ha Moheskola, ha Balat, ha Phodkroh, ha Rambrai, Maweit, Mawdonglang bad ban buh P.Out Post ha Nongshillong, Markasa lane ha kano kano ka jaka ba long pdeng hapoh ka Mawthadraishan Block.